Ońtústikte pııazdy keptirý tsehy iske qosylady
Osy bastamany qolǵa alǵan «Mart» JShS pııaz ósirýmen aınalysatyn sharýa qojalyqtarynyń basyn biriktirýdi josparlap otyr, dep habarlaıdy QazAqparat HAA tilshisi.
Seriktestik tsehtyń qural-jabdyqtaryn «Ońtústik» Aımaqtyq ınvestıtsııalyq ortalyǵy (AIO) arqyly lızıngke satyp almaq. Kásiporynnyń ereksheligi - naryqta suranysqa ıe bolmaýy saldarynan qaldyqqa aınalǵan, daladan jınap alýǵa da jaramaı qalǵan ónimderdi keptirýmen aınalysýynda. Basty maqsat - pııaz ónimin ysyrapsyz jınap alyp, ýaqytyly saýdalaýda bolmaq. Ári jaramsyz kúıge túsken ónimdi kádege jaratpaqshy. Osylaısha dıqandar pııazdaryn naryqqa shyǵarýmen qosa, olardyń jaramaıtyndaryn qaldyqsyz ári qosymsha paıdamen jumys isteý múmkindigine ıe bolady. Oǵan qosa, sharýalardyń birigip jumys isteýiniń arqasynda kooperatıv qurylyp, kishi sharýa qojalyqtary iri kásiporynǵa aınalady.
Aıta ketý kerek, Ordabasy aýdanyndaǵy dıqandardyń negizgi bóligi pııaz ósirýmen aınalysady. Osyǵan oraı aýdanda «OŃTÚSTІK» AIO ókilderi kooperatıv qurýǵa nıetti sharýalardyń basyn qosyp, semınar-trenıng ótkizdi.
Óz kezeginde «OŃTÚSTІK» AIO Basqarma basshysynyń orynbasary Dáýlet Mamyrov kooperatıv arqyly birige jumys jasaǵan sharýalarǵa memleket tarapynan kóptegen jeńildikter men nesıe alýdyń joldaryn túsindirip berdi.
«Kooperatıvterdi qarjylandyrý bizde basym baǵyt retinde qaralyp otyr. Eger birigýge nıetti sharýa qojalyqtary bolsa, bizden keńes alýyna bolady. Sondaı-aq bizdiń ortalyq bıznes jospar ázirleý, qujat jınaý sekildi mańyzdy sharýalarǵa qol ushyn bere alady»,- dedi Dáýlet Mamyrov.
Al, kásipkerlerge qyzmet kórsetý ortalyǵynyń mamany aýylsharýashylyq kooperatıvterin qurýdyń negizgi artyqshylyqtaryna toqtalyp, oı bólisti.