Ońtústikte ótken Naýryz merekesinde Astananyń 20 jyldyǵyna tartý jasaldy
Týyndyda «Astana» ánin 20 ánshi oryndap, birneshe bı ujymdary óner kórsetti. Tartý retinde sahnalanǵan kompozıtsııaǵa bas-aıaǵy 100-ge jýyq adam qatysty. Oblys basshysy Janseıit Túımebaev óńir turǵyndary men qonaqtaryna Naýryz merekesine oraı tilek aıtyp, elimizdiń bas qalasy Astananyń da mereıtoıymen quttyqtady.
«Bıyl 20 jyldyǵy toılanǵaly otyrǵan ıisi qazaq jurtynyń maqtanyshyna aınalǵan Arqa tósindegi araıly da arý qala Astanany salýymyz - elimizdiń jasampazdyǵynyń aıǵaǵy. Elbasymyz Nursultan Nazarbaevtyń kóshbasshylyǵymen aldymyzǵa asqaq maqsattar qoıyp otyrmyz. Álemdegi barynsha damyǵan 30 memlekettiń qataryna qosylyp, Máńgilik elge aınalý jolynda senimdi qadamdar jasaýdamyz. Ulystyń uly kúninde kıeli Qazyǵurt taýynyń basynda ótip jatqan osynaý dúbirli toı yntymaǵymyzdy nyǵaıtyp, birligimizdi bekemdeı tússin», - dedi Janseıit Qanseıituly.
Shara barysynda jurt sondaı-aq sımvolıkalyq keme tektes sahnadan kóne tarıh pen dástúrden syr shertetin teatrlandyrylǵan qoıylymdardy tamashalady. Aıtýly meıramda kórisý, amandasý syndy joralǵylar jasalyp, ulttyq oıyn men salt saltanat qurdy.