Ońtústikte «Ordabasy» qoı tuqymynyń sany 125 myńǵa jetkizilmek

ShYMKENT. QazAqparat - Ońtústik Qazaqstan oblysynda «Ordabasy» qoı tuqymynyń sany 125 myńǵa jetkizilmek. Bul týraly búgin Óńirlik kommýnıkatsııalar qyzmetinde ótken etti-maıly ordabasy tuqymyn ósirýdiń jáne qozy etin óndirýdiń ozyq tehnologııalaryna arnalǵan baspasóz-konferentsııasynda «Ońtústik Batys mal jáne ósimdik sharýashylyǵy ǵylymı-zertteý ınstıtýty» JShS Bas dırektorynyń mal sharýashylyǵy jónindegi orynbasary Nuradın Álibaev málim etti, dep habarlaıdy QazAqparat HAA tilshisi.

Spıker Elbasy Joldaýynda aıtylǵan agrarlyq sektor ekonomıkanyń jańa draıverine aınalýy kerek degen tapsyrmasyna oraı, aldaǵy 4 jylda ıaǵnı, 2021 jylǵa qaraı «Ordabasy» qoı tuqymynyń sanyn 125 myńǵa jetkizý josparlanyp otyrǵanyn atap ótti. Ol úshin arnaıy baǵdarlamada jasalyp jatyr eken.

 

Aıta keteıik, búginde paıdasy mol «Ordabasy» qoı tuqymy aýylsharýashylyq óndirisine keńinen engizilýde. Onyń sany 75 myńnan assa, taza tuqymdylarynyń sany 36 myńnan asady.

 

Qazaqstanda etti-maıly qoı sharýashylyǵyn turaqty damytýdyń basty baǵyttary boıynsha aldyńǵy qatarly tájirıbemen bólisken Nuradın Álibaev qazaqtyń qylshyq júndi quıryqty qoıy men edilbaı tuqymy jáne sheteldik - gıssar tuqymynyń býdandastyrylýy negizinde «Ordabasy» qoı tuqymy jasalynǵanyn jetkizdi.

Usaq maldyń osy túrin kóbeıtýmen aınalysatyn sharýa qojalyqtarynyń tóraǵalary jańa qoı tuqymynyń basqa da  artyqshylyqtaryna toqtaldy. Olardyń aıtýynsha, bul qoıdyń basqa qoıdan ereksheligi onyń salmaǵynyń ádettegiden joǵary bolýy. Máselen, analyqtar 72-85 kg bolsa, qoshqarlar 103,5-123 kelige deıin tartady. Sondaı-aq «Ordabasy» qoı tuqymy etti-maıly álemdik qoı tuqymdarymen básekeles bolyp otyr.