Ońtústikte aýdan-qala ákimderi halyqty tolǵandyrǵan saýaldarǵa tikeleı efırde jaýap beredi

TÚRKІSTAN. QazAqparat – Túrkistan oblysynda COVID-19 pandemııasynyń taralýyna jol bermeý maqsatynda júıeli jumystar atqarylyp jatyr. Osyǵan oraı oblys ákiminiń orynbasary Sáken Qalqamanov Zoom baǵdarlamasy arqyly baılanysqa shyǵyp, respýblıkalyq BAQ ókilderine oblystaǵy epıdemıologııalyq ahýaldy baıandady, dep habarlaıdy QazAqparat tilshisi.

Sáken Qalqamanovtyń aıtýynsha, pandemııamen kúres kezindegi qolǵa alynǵan sharalar jáne aldyńǵy kezektegi máselelermen turǵyndardy aqparattandyrý basty nazarda.

Osy rette oblys ákiminiń orynbasary naýryz aıynan beri kúndelikti Facebook áleýmettik jelisi arqyly tikeleı efırge 58 ret shyǵyp, BAQ ókilderi men turǵyndardy mazalaǵan suraqtarǵa jaýap bergen. Jurtshylyqty udaıy atqarylǵan jumystardyń barysymen tanystyryp keledi.

Bul úrdis jalǵasyn taýyp, endi oblystaǵy 16 aýdan-qala ákimderi belgilengen kestege saı kúndelikti turǵyndarmen tikeleı baılanysqa shyǵatyn boldy. Osylaısha jergilikti bılik ókilderi halyqty tolǵandyrǵan suraqtarǵa jaýap bermek.

Ákimderdiń arasynda birinshi bolyp Kentaý qalasynyń ákimi Dáýren Maqajanov pen Túlkibas aýdany ákiminiń orynbasary Erlan Kúzembaev tikeleı efırge shyǵyp, pandemııaǵa qarsy kúres jáne dári-dármek máselesi boıynsha atqarylyp jatqan jumystaryn baıandady.

Efır barysynda turǵyndar osy kezeńde kórsetiletin kómek pen aldaǵy jospar jaıly suraqtar qoıyp, tolyqqandy jaýap aldy.