Ońtústikte 50 myńǵa jýyq jasóspirim «Adaldyq saǵatyna» qatysty

TÚRKІSTAN. QazAqparat – QR Sybaılas jemqorlyqqa qarsy is-qımyl agenttiginiń bastamasymen jáne Bilim jáne ǵylym mınıstrliginiń qoldaýymen elimizdiń barlyq bilim berý uıymdarynda alǵash ret biryńǵaı jalpyrespýblıkalyq «Adaldyq saǵaty» ótti, dep habarlaıdy QazAqparat tilshisi.

Biryńǵaı saǵat Túrkistan oblysyna qarasty barlyq bilim oshaqtaryn, onyń ishinde 903 mektep, 68 kolledj, 2 joǵary oqý ornyn (Q.A.ıAsaýı atyndaǵy Halyqaralyq qazaq-túrik ýnıversıteti, Syrdarııa ýnıversıteti) qamtydy. sabaqtyń maqsaty - óskeleń urpaqtyń boıyna adaldyq, parasat, ádildik, senim sekildi qundylyqtardy sińirýge jáne jas býynnyń rýhanı bolmysyn bekitip, sybaılas jemqorlyqqa qarsy mádenıetin qalyptastyrý. Dáris barysynda aýdan jáne qala ákimderi lektor boldy. Sondaı-aq, ákim orynbasarlary, oblystyq jáne aýdandyq máslıhat hatshylary, «Nur Otan» partııasynyń oblystyq, aýdandyq fılıal basshylarynyń birinshi orynbasarlary, memlekettik, quqyq qorǵaý jáne sot organdarynyń basshylary men arnaıy monıtorıng tobynyń ókilderi shaqyryldy.

Máselen, halyqaralyq qazaq-túrik ýnıversıtetiniń stýdentterine dáris oqyǵan agenttiktiń Túrkistan oblysy boıynsha departamentiniń basshysy H.Kóshqalıev jastardy jańa oqý jylymen quttyqtap, sybaılas jemqorlyqpen qarqyndy kúres - el saıasatynyń negizgi basym baǵyttarynyń biri ekendigin atap ótti.

Óńirdegi 50 myńǵa jýyq shákirtti qamtyǵan sharadan qoǵam belsendileri de qalys qalmady. Atap aıtqanda, daryndy jazýshy, jýrnalıst M.Baıǵut, oblystyń Ádep jónindegi ýákili Á.Álishev, Jýrnalıster Odaǵy oblystyq fılıalynyń basshysy Ǵ.Elshibaı, belgili aıtysker-aqyn, Balalar men jasóspirimder ortalyǵynyń dırektory B.Shoıbekov, qazaq kúresinen Qazaqstannyń birneshe dúrkin chempıony A.Narbek sekildi zııaly qaýym ókilderi men sport sheberleri belsene atsalysty.

Shara barysynda lektorlar qazaqtyń boıynda baǵzydan qalyptasqan adaldyq pen ádildik qundylyqtarynyń qasıetin qazbalap, taǵylymǵa toly tarıh betterindegi ádildikti tý etken kemeńgerlerdiń týralyǵyna toqtaldy. Sondaı-aq, Elbasy bıylǵy jyldy «Jastar jyly» dep jarııalap, el jastaryna zor senim bildirgenin, Qazaqstannyń jarqyn bolashaǵy – búgingi jas býynnyń qolynda ekenin jetkizdi. «Adaldyq saǵatynda» bilim alýshylarǵa arnaıy ázirlengen beınerolıkti kórsetý arqyly adaldyq – parasattyń eń bıik shyńy, ári adam boıyndaǵy eń asyl qasıet ekendigi jiti túsindirildi. Aıta keteıik, bul ıgi bastama dástúrli túrde jyl saıyn 1 qyrkúıek – Bilim kúninde bastalyp, oqý jylynyń sońyna deıin júıeli túrde elimizdiń abyroıyn asqaqtatyp júrgen el maqtanyshtary men qoǵam belsendilerin qatystyra otyryp ótkiziletin bolady.