Ońtústikkoreıalyq dárigerler Qazaqstannan barǵan qyzǵa tegin ota jasady

ASTANA. QazAqparat - «AıALA» qaıyrymdylyq qory men  Pýsan ulttyq ýnıversıteti Gospıtaliniń yntymaqtastyǵy aıasynda Ótegen batyr aýylynda ornalasqan Almaty oblystyq klınıkalyq balalar aýrýhanasynda em alatyn túrli aýrýy bar 80-nen astam bala tegin qaraldy, dep habarlaıdy atalǵan qordyń baspasóz qyzmeti.

Konsýltatsııa sheńberinde Ońtústik Koreıanyń ortopedııalyq hırýrgııa professory Lı Chjon Sop 13 jastaǵy Samal Jaılaýbaıǵa týa bitken skolıoz dıagnozyn qoıdy. Qyzdyń omyrtqasy týǵannan bastap maıysyp, jambasy men arqasy qatty aýyrady eken.

Zertteý nátıjeleri boıynsha professor Lı Chjon Sop túzetý otasyn jasaýdy usyndy. Koreıanyń densaýlyq saqtaý ındýstrııasyn damytý ınstıtýtynyń jáne Pýsan ulttyq ýnıversıteti Gospıtaliniń «Tegin medıtsına» birlesken jobasy aıasynda qyzǵa álemdegi jetekshi ortopedııalyq klınıkalardyń biri bolyp tabylatyn Pýsan ulttyq ýnıversıtetiniń Gospıtalinde ota jasaý usynyldy.

Aıta ketsek, Qazaqstanda bul aýrý sırek kezdespeıdi. Alaıda osy baǵyttaǵy medıtsına áli damý ústinde jáne hırýrgııanyń bul salasyndaǵy tájirıbeniń bolmaýynan ota jasaý qıyndyq týǵyzar edi.

Qazan aıynyń basynda qyz anasymen birge Pýsanǵa jolǵa attandy. 12 qazanda 4 saǵatqa sozylǵan ota jasaldy. Hırýrgııalyq otadan keıin Samal Jaılaýbaıdyń boıy ósip, salmaǵy artty.