Ońtústikqazaqstandyq delegattar Qazaqstan-Koreıa ınvestıtsııalyq forýmyna qatysty
Forým barysynda aımaq basshysy Janseıit Túımebaev Ońtústik Qazaqstan oblysynyń ınvestıtsııalyq áleýetin tanystyryp, ınvestıtsııalyq jobalardy tabysty júzege asyrý úshin qurylǵan múmkindikterdi atap ótti. Sonymen qatar árbir jobany jeke óz tarapynan qoldaýǵa daıyn ekendigin jetkizdi.
«Ońtústik Qazaqstan oblysy - ekonomıkalyq áleýeti zor, turaqty damyp kele jatqan óńir. Aımaq Orta Azııa, Taıaý Shyǵys pen Eýropa elderin baılanystyratyn joldardyń qıylysynda ornalasqan, sonyń nátıjesinde shekaralyq saýda-sattyq pen eksporttyq óndiris damyp keledi. Tarıhı ólkeniń agrarly salasy jaqsy damyǵan. Sońǵy 3 jylda jınalǵan baqsha ónimderiniń kólemi 1 mıllıon tonnadan asyp túsedi. Qazaqstandaǵy jylyjaıdyń 90 paıyzy bizdiń óńirde ornalasqan. Maqta tolyǵymen, al júzim men baqsha ónimderiniń 70 paıyzy osy oblysta ósiriledi. Indýstrııalandyrý boıynsha elimizdegi júzege asyp jatqan árbir besinshi joba Ońtústik Qazaqstan oblysyna tıesili. Sońǵy 8 jyl ishinde óńirde jalpy quny 735 mln AQSh dollarynan astam qarjyǵa 175 joba iske qosylǵan. Sondaı-aq, ınvestıtsııa kólemi 3,6 mlrd AQSh dollaryn quraıtyn 75 joba 2020 jylǵa deıin júzege asady»,-dedi J.Túımebaev.
Sonymen qosa óńir ekonomıkasy ártaraptandyrylǵanyn aıtqan əkim oblysta 177 myńnan astam bıznes sýbektileri tirkelgenin məlim etti. Sondaı-aq, oblysta sheteldik ınvestorlar úshin tıimdi bolatyn Indýstrıaldy-ınnovatsııalyq baǵdarlama aıasynda 11 ındýstrıaldyq jáne 1 arnaıy ekonomıkalyq aımaq jumys isteıtinin atap ótti.
Ońtústik Qazaqstan oblysynyń ákimi bastap barǵan kásipkerler men damý ınstıtýttarynan quralǵan delegattar POSCO DAEWOO, HANWHA GROUP, HYUNDAI CORPORATION jáne LS Cable & System sekildi Ońtústik Koreıanyń transulttyq kompanııalarymen birqatar mańyzdy kezdesýler ótkizdi.
Kezdesý barysynda ońtústikqazaqstandyq delegattar koreı ınvestorlaryna óńirdiń perspektıvti salalaryn usyndy. Sondaı-aq, kelissózder barysynda taraptar óńirde júzege asatyn jańartylatyn energııa kózderi men metallýrgııa jáne tsıfrlyq tehnologııalar, sonyń ishinde qurylys salasyndaǵy ozyq tehnologııalar salasyndaǵy birlesken jobalardy talqylady.
Ekijaqty qarym-qatynastyń joǵary deńgeıin atap ótken aımaq basshysy qazirdiń ózinde Ońtústik Qazaqstanda Ońtústik Koreıanyń iri kompanııalary jumys istep jatqanyn jáne áleýetti ınvestorlardy jobanyń iske asyrylýyna deıin qoldaý bildiretin óńirlik damý ınstıtýttarymen jumysyn jandandyrýǵa shaqyrdy.
Budan bólek, Ońtústik Koreıanyń iri kásiporyndarynyń biri bolyp tabylatyn HANWHA GROUP kompanııasymen Saryaǵash aýdanynda kýrorttyq aımaq qurý boıynsha jáne energetıka salasyndaǵy perspektıvalyq jobalar talqylandy. Sondaı-aq, energetıka salasyn damytý boıynsha jobalar ınfraqurylymdy elektrmen jabdyqtaý jáne azyq-túlik óndirisi úshin resýrstyq bazany qurý boıynsha álemdik tájirıbege ıe Koreıanyń POSCO DAEWOO korporatsııasymen kelissózder júrgizildi. Sonymen qatar oblys ákimniń shaqyrtýyn kabel óndirýshi osy saladaǵy álemdegi eń úzdik tehnologııalarǵa ıe LS Cable & System kompanııasy aldy.
Forýmnyń ekinshi kúni oblys ákimi J.Túımebaev Seýl qalasynyń vıtse-merimen kezdesti. Kezdesý barysynda taraptar qala qurylysy jobalaryndaǵy zamanaýı ınfraqurylymdyq sheshimder jaıyn sóz etti. Osy rette oblys ákimi ekijaqty áriptestikti talqylaý maqsatynda Seýl qalasynyń ákimin Ońtústik Qazaqstan oblysyna shaqyrdy.