Ońtústikqazaqstandyq 6 ardager «Máskeý úshin shaıqasqa 75 jyl» tósbelgisimen marapattalady
Reseı konsýly Ońtústik Qazaqstan oblysynyń ákimi Janseıit Túımebaevpen kezdesip, Vladımır Pýttınniń jarlyǵymen ońtústikqazaqstandyq ardagerlerdiń «Máskeý úshin shaıqasqa 75 jyl» mereıtoılyq tósbelgisimen marapattalǵanyn jetkizdi.
«Bul kisiler - erliktiń etalony. Ár urpaq olardy úlgi tutýy tıis. Qatarlary sırep qalǵan tusta olarǵa aıryqsha qurmet kórsetý - erlikke taǵzym jasaýmen, ónege iske jol salýmen para-par. Olardyń janarlarynan aýyr, azapty kúnderdiń tabyn kórýge bolady. Basyn báıgige tigip, jarqyn bolashaq syılaǵany úshin myń alǵys», - dedi Alekseı Demın.
Óz kezeginde oblys ákimi de elshiniń jaqsy jańalyǵyna rızashylyq bildirip, Uly Otan soǵysynyń adamzat tarıhyndaǵy zardap-zalaldaryna toqtaldy.
«Biz babalarymyzdyń erlik isterin eshqashan umytpaýǵa tıistimiz. Uly Otan soǵysyndaǵy Keńes áskeriniń jeńisi álemge beıbitshilik syılady. Sondyqtan biz búgingi kózi tiri batyrlarymyzdy ulyqtap, olarǵa barynsha qamqorlyq kórsetýimiz qajet», - dedi Janseıit Qanseıituly.
Marapattalǵandardyń qatarynda Gıtlerdiń Barborossa josparyn tas-talqan etken qasa tuıǵyndardyń biri Qudaıbergen Tuńǵyshbaev ta bar. Ol surapyl soǵysta barlaýshy mergen bolǵan. Sol aıaǵyna oq tıip, aýyr jaraqattanǵan kezde ǵana elge qaıtty. Jeńis týyn jelbiretýge kúsh salǵan jaýynger erliktiń eskerýsiz qalmaǵanyna razy. Búgingi syıǵa 95-tegi ardager aıryqsha qýandy. Al, Nıkolaı Makarov 20 jasynda maıdanǵa attanyp, qan maıdanda erlikpen soǵysqan jandardyń biri. Máskeý úshin bolǵan shaıqasqa qatysqan aqsaqal da tósbelgi taǵyp, marapattaldy. Mereke qarsańynda mereıi ósip, marqaıyp qalǵan qarııalar memleket jasaǵan qamqorlyq pen iltıpatqa dán rızashylyqtaryn bildirdi.
«Árıne, men óte qýanyshtymyn! Reseıdiń Prezıdenti bizdi umytpaı, eskerip jatqany úshin baqyttymyn. Odaqtas elderdiń birligi jasasyn! Tereń tarıhy tamyryn úzbesin! Rahmet bárine», - deıdi soǵys ardageri Nıkolaı Makarov.
Aıta keteıik, marapatqa usynylǵan ońtústikqazaqstandyq ardagerdiń beseýiniń kózi tiri. Eki ardager K. Tuńǵyshbaev pen N. Makarov Shymkent qalasynda, P. Krıvka, K. Kenjebekov pen M. Babashovtar Arys qalasynda turyp jatyr. Al altynshy ardager M. Yrysmetovtiń tósbelgisi balasyna tabystalatyn bolady. Al, búginde óńirde 249 UOS ardageri men 20 229 til eńbekkeri ómir súrip jatyr.