Ońtústik jurtshylyǵy latyn qarpine ótýdi qoldaıdy
Oblystyq «Qoǵamdyq kelisim» mekemesiniń konferents-zalynda Ońtústik Qazaqstan oblystyq Qazaqstan halqy Assambleıasynyń keńesi ótti. Jıyndy Ońtústik Qazaqstan oblystyq Qazaqstan halqy Assambleıasy hatshylyǵynyń meńgerýshisi Muratáli Qalmuratov júrgizip otyrdy.
Keńestiń ashylýynda sóz alǵan Ońtústik Qazaqstan oblystyq Qazaqstan halqy Assambleıasy hatshylyǵynyń meńgerýshisi Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasyndaǵy negizgi basymdylyq latyn grafıkasyn kóshý ekenine toqtaldy. «Ortaq istiń úlken jaýapkershiligin sezine otyryp, biz sizderdi óz oılaryńyzdy ortaǵa salyp latyn qarpine kóshý joldaryn talqylaýǵa shaqyrdym», - dedi M.Qalmuratov.
Keńeste pedagogıka ǵylymdarynyń doktory, professor, MǴA akademıgi Asma Qalybekova, oblystyq koreı etnomádenı ortalyǵynyń tóraıymy Roza Pak jáne ózge azamattar óz oılaryn ortaǵa saldy.
Keńestiń qatysýshylary biraýyzdan latyn qarpine ótý bastamasyn qoldaıtyndyqtaryn bildirdi. Sondaı-aq keńestiń qatysýshylary latyn qarpine ótý jolynda tıimdi usymdardy daıyndaýǵa belsene atsalysatyndyǵyn málimdedi.
Aıta keterligi, keńeske oblystaǵy etnomádenı birlestikterdiń tóraǵalary, oblystyq ardagerler keńesi, ǵylymı jáne shyǵarmashylyq ıntellıgentsııa ókilderi, úkimettik emes uıymdar, buqaralyq aqparat quraldarynyń ókilderi, saıası partııalar men kásipodaqtar jáne depýtattar qatysty.