Ońtústik jastary Elbasy qoıǵan mindetterdi oryndaýǵa daıyn

TÚRKІSTAN. QazAqparat - Prezıdent búgingi Joldaýynda jastar men otbasy ınstıtýtyn keshendi qoldaý memlekettik saıasattyń basym tusyna aınalýy tıis ekendigin jetkizdi. Sondaı-aq, jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý kerektigin nyqtady, dep habarlaıdy QazAqparat. 

Memleket basshysynyń kezekti Joldaýyna baılanysty Túrkistan oblysy ákimdiginde ótken brıfıngte oblystyq otbasy, balalar jáne jastar isteri jónindegi basqarmasynyń basshysy Balmarjan Narbekova Túrkistan óńiriniń jastary Joldaýdy qoldaýǵa daıyn ekendigin aıtty.

 «Elbasy Nursultan Ábishuly Nazarbaev «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna kezekti Joldaýynda 2019 jyl - jastar jyly dep ataýdy usynamyn dedi. Munyń ózi jastarǵa arnalǵan úlken qoldaý. Joldaýda aıtylǵandaı, 2019 jyldyń 1 qańtarynan bastap eń tómengi jalaqyny 1,5 ese, ıaǵnı 28 myńnan 42 myńǵa deıin ósirýdiń ózi jastarǵa edáýir kómek bolmaq. Bul turǵyda Túrkistan óńiriniń jastary Joldaýda aıtylǵan barlyq mejelerdi oryndaýǵa daıyn», - dedi Balmarjan Polatqyzy. 

Sonymen qatar, Prezıdent aýyldyq jerlerdiń áleýmettik ortasyn jańǵyrtýǵa baǵyttalǵan «Aýyl - El besigi» jobasynyń iske qosylýyn tapsyrdy. Sondaı-aq, «Sarbaz» balalar-jasóspirimder birlestigin quryp, mektepterde áskerı-patrıottyq tárbıeniń rólin kúsheıtý qajettigin aıtty.