Ońtústik Shyǵys Azııada quldyqta bolǵan Qazaqstannyń 14 azamaty bosatyldy

ASTANA. QazAqparat – Byltyrǵy maýsym aıynan beri Ońtústik Shyǵys Azııa elderinde quldyqta bolǵan 14 Qazaqstan azamatyna kómek kórsetildi. Bul týraly elordada ótken baspasóz máslıhatynda Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

«Byltyrǵy maýsym aıynan qazirgi ýaqytqa deıin Taılandtaǵy elshiligimiz Qazaqstannyń 14 azamatyna kómek kórsetti. Olardy májbúrli túrde jumysqa salynǵan. Sonymen qatar bul adamdar Mıanma men Laosta bolǵany anyqtaldy», - dedi A. Smadııarov.

Osy oraıda ol shetelge barǵysy keletin elimizdiń azamattary kóbine aldanyp qalatynyn aıtty.

«Kóbinese bizdiń azamattar shetelge joǵary jalaqyǵa qyzyǵyp jumysqa barady. 2-3 myń AQSh dollaryna deıin aılyq tóleımiz dep kompanııalar shaqyrǵan kezde, adamdar sharttyń mazmunyna mán bermeı jatady. Sonyń saldarynan keıin qıyn jaǵdaıǵa tap bolady. Shetelge barar aldynda búkil qujatty muqııat qarap shyǵýǵa keńes beremiz», - dedi resmı ókil.

Budan buryn habarlanǵandaı, – Mıanmada quldyqtan bosap shyqqan Qazaqstanyń eki azamaty elge jetkizildi.

Foto: api.theins.info