«Ońtústik» óńirlik qolbasshylyǵynda brıgadalyq taktıkalyq oqý-jattyǵý ótti

ASTANA. QazAqparat - «Mátibulaq» polıgonynda jaýyngerlik oq atýmen brıgadalyq taktıkalyq oqý-jattyǵýdyń belsendi fazasy ótti, dep habarlaıdy QR Qorǵanys mınıstrliginiń baspasóz qyzmeti.

Oqý-jattyǵý barysynda «Ońtústik» óńirlik áskerı bólimderiniń biri jaýyngerlik ázirlikke keltirilip, shoǵyrlaný aýdanyna túngi jaǵdaılarda marsh jasady jáne qorǵanys jolaǵyna ornyqty. Oqý-jattyǵýdyń ereksheligi ózge garnızondardan almastyrylǵan motoatqysh, artıllerııalyq, barlaý jáne ınjenerlik-saperlik bólimshelermen kúsheıtilgen brıgadalyq taktıkalyq toptyń áskerı bólimi negizinde qurylýy boldy.

Qorǵanyp jatqan áskerlerge atyspen qoldaýdy Áskerı-áýe kúshteriniń shabýyldaý jáne armııalyq avıatsııasy kórsetti.

Odan basqa, oqý-jattyǵý barysynda arnaıy tapsyrmalardy UQK Shekara qyzmeti men QR ІІM Ulttyq ulan organdary oryndady.

Oqý-jattyǵýǵa barlyǵy eki jarym myńǵa jýyq áskerı qyzmetshi qatysty, 400-den asa birlik qarý-jaraq pen áskerı tehnıka tartyldy. Oqý-jattyǵýdyń belsendi fazasynla brıgadalyq taktıkalyq top shartty qarsylastyń tas-talqanyn shyǵaryp, shabýylǵa kóshe otyryp, ony kúıretti. Atalmysh oqý-jattyǵý áskerlerdi jaýyngerlik ázirlikke keltirý, brıgadalyq taktıkalyq topty qurý jáne jekelegen baǵytta jaýyngerlik tapsyrmalardy oryndaý máselelerin egjeı-tegjeıli pysyqtaýǵa múmkindik berdi.