«Ońtústik» óńirlik qolbasshylyǵynda 120 áskerıge páter kilti tapsyryldy

ASTANA. QazAqparat - Jambyl oblysyndaǵy 120 páterli bes turǵyn úı paıdalanýǵa berildi. «Ońtústik» óńirlik qolbasshylyǵyna qarasty 91678 áskerı bóliminiń áskerı qyzmetshilerine qonystoı toılaý baqyty buıyrdy, dep habarlaıdy QR Qorǵanys mınıstrliginiń baspasóz qyzmeti.

Jaryq jáne janǵa jaıly páterler atalǵan áskerı bólimde budan buryn bolǵan áskerı qyzmetshilerdiń áleýmettik-turmystyq máselesin tolyqqandy sheshýge múmkindik berdi. Endi áskerı qyzmetshilerdiń 120 otbasy jaıly páterlermen qamtamasyz etildi.

Saltanatty jáne merekeli kúnde «Ońtústik» ÓńQ qolbasshysy general-maıor Marat Qusaıynov áskerı qyzmetshiler men olardyń otbasylaryn quttyqtady. «Elbasy men Qorǵanys mınıstrliginiń 2016 jyly sheshken basty máseleleriniń biri áskerı qalashyqtardyń ınfraqurylymyn jetildirý, áskerı qyzmetshilerdiń alańdamaı, beıqam qyzmet etýi úshin olardyń otbasy múshelerine qolaıly jaǵdaı jasaý bolyp tabyldy. Sizdiń polkińizdiń barlyq jeke quramyna qajyrly eńbekte sáttilik, jańa páterde otbasylyq baqyt, qonystoı toılaýda qýanysh, bereke jáne myqty densaýlyq tileımin», - dedi ol.

Baspanamen qamtamasyz etý - qazaqstandyq áskerı qyzmetshilerge áleýmettik qoldaý kórsetýdiń basymdyq baǵyttarynyń biri. Bul máselege Qorǵanys mınıstrligi erekshe nazar aýdarady. Jyl saıyn elimizdiń túkpir-túkpirinde turǵyn úıdi kúrdeli jóndeý, salý jáne páterlerdi satyp alý arqyly paıdalanýǵa berý áskerı qyzmetshiler men olardyń otbasy músheleriniń ómir súrý jáne ál-aýqat deńgeıi jaqsara túsedi.