Ońtústik óńirlerdegi sýarmaly jerler boıynsha sharalar qabyldanady — Úkimet

NUR-SULTAN. QazAqparat - QR Premer-Mınıstri Álıhan Smaıylov aldaǵy vegetatsııalyq kezeńde Qazaqstannyń ońtústik óńirleriniń aýyl sharýashylyǵy taýaryn óndirýshilerin sýarmaly sýmen qamtamasyz etý máseleleri jóninde keńes ótkizdi, dep habarlaıdy QazAqparat primeminister.kz-ke silteme jasap.

Ekologııa, geologııa jáne tabıǵı resýrstar, aýyl sharýashylyǵy, energetıka mınıstrleri, sondaı-aq Qyzylorda, Túrkistan jáne Jambyl oblystarynyń basshylyǵy Aral-Syrdarııa basseıninde qalyptasqan jaǵdaı týraly baıandady. Bıyl sýdyń az kelýine baılanysty Qyrǵyz Respýblıkasynyń aýmaǵyndaǵy Toqtoǵul sý qoımasyna jınalǵan sýdyń kólemi ótken jylǵy deńgeıge jetpeıdi. Qyrǵyzstannyń óziniń sý-energetıkalyq qajettilikterin qamtamasyz etýi tıis ekenin eskere otyryp, Qazaqstan aýmaǵyna jiberiletin sý kóleminiń tómendeý qaýpi bar.

Premer-Mınıstr Ekologııa, geologııa jáne tabıǵı resýrstar, sondaı-aq Energetıka mınıstrlikterine kóktemgi-jazǵy kezeńde elimizdiń ońtústik óńirleriniń sýarmaly jerlerin sýmen qamtamasyz etý úshin túbegeıli sharalar qabyldaýdy tapsyrdy. Á. Smaıylov transshekaralyq ózenderdiń resýrstaryn paıdalaný boıynsha ózara tıimdi sheshimder qabyldaý úshin Qyrǵyzstanmen jáne Ózbekstanmen qarqyndy kelissózder júrgizý qajet ekenin atap ótti. Aýyl sharýashylyǵy mınıstrligine sý únemdeý tehnologııalaryn jáne agrarlyq salada sý resýrstaryn tıimdi paıdalanýdyń basqa da quraldaryn engizý aıasyndaǵy jumysty kúsheıtý tapsyryldy.