Ońtústik óńirdiń áskerı bólimderi men mekemeleri tekserildi

NUR-SULTAN. QazAqparat - Qazaqstannyń qorǵanys mınıstri Nurlan Ermekbaev Shymkent, Arys garnızondary men Túrkistan qalasyna jumys saparymen baryp keldi, dep habarlaıdy QR Qorǵanys mınıstrliginiń baspasóz qyzmeti.

Arystaǵy áskerı bólimde bolǵan tótenshe jaǵdaıdyń saldaryn joıý jónindegi jumys, atap aıtqanda qarý-jaraq, áskerı tehnıka jáne ınjenerlik-saperlik batalonynyń jabdyqtary, saperlerdi zaqymdaýdan qorǵaıtyn «Dospeh» sonymen qatar, «Sokol», «Ten» qorǵaý kostıýmderi tekserildi.

Áskerı bólim komandıriniń mindetin ýaqytsha atqarýshy – shtab bastyǵy polkovnık Temirbek Erimbetov uıymdastyrylǵan jumys, jumsalyp jatqan kúsh pen qural, oryndalǵan jáne josparlanǵan is-sharalar jóninde baıandady. Dál sol kúni ony QR Qorǵanys mınıstriniń buıryǵymen taǵaıyndaǵan áskerı bólimniń komandıri retinde tanystyrdy.

Mınıstr jeke quramdy batalon retinde qurylǵanymen quttyqtap, qyzmette tabys, oqý-jaýyngerlik mindetterdi odan ári atqarýǵa qatysty tilek bildirdi.

Odan basqa, jarylǵysh quraldardy zalalsyzdandyrý mamandarynyń daıyndyq barysy tekserildi. Ótken aıda sheteldik mamandardyń usynymdaryn eskere otyryp, jarylǵysh zattardy izdeý, tabý jáne joıý jumystary jónindegi kásibı mamandardy daıyndaıtyn arnaıy kýrstar ashyldy.

Qazirgi kezde Arys mańynda jedeldetilgen top jumysyn jalǵastyryp, oq-dárilerdi basqa qoımalarǵa jetkizý jumysy atqarylýda. Jalpy barlyq kezeń boıynsha áskerı mamandar qoımadan 1250 sharshy metrden astam aýmaqqa oq-dárilerdiń qaldyqtaryn izdeý men jınaý jumystary júrgizildi.

Súńgýir top 30 shaqyrymǵa jýyq jergilikti ózenniń arnasyn tazartty. Áskerı qalashyqta 13 turǵyn úı, ákimshilik-qazarmalyq aýmaqta 16 ǵımarat qaıta qalpyna keltirilip, Arys-Shardara jolynyń 7 shaqyrymyna jóndeý jumysy júrgizildi.

Qyzmettik issapar barysynda áýe shabýylyna qarsy brıgada oqý-jattyǵý dabyly boıynsha qaýyrt kóterildi. Kezekshi kúshter men quraldar shartty qarsylasty anyqtaý men ony joıý jónindegi oqý-jaýyngerlik maqsatyn tolyqtaı oryndady. Qorytyndy retinde áskerlerdi jaýyngerlik ázirlikti odan ári damytý jóninde nusqaýlar berildi.

Túrkistan qalasyna sapary barysynda oblystyq Qorǵanys isteri jónindegi departamenti jáne «Túrkistan» áýejaıyndaǵy áskerı sektoryna qatysty ákimshilik ǵımarattarynyń jobalary tanystyryldy. Olardy tapsyrý merzimderi 2023 pen 2024 jyldardyń tamyz aılaryna josparlanǵan.