Ońtústik Koreıanyń Phenchhan qalasyndaǵy XIII qysqy Olımpıada oıyndary aıaqtaldy
Olımpıadanyń jabylý saltanaty da ashylýy sııaqty qyzyqty ári áserli ótti. Koreıalyqtar jaryq texnologııalaryn sheber koldana bildi. Trıbýnada ornatylǵan shaǵyn LED qurylǵylar arqyly álem elderiniń týlary, Olımpıadanyń qýanyshty sátteri jáne taǵy basqa aıshyqty kórinister berildi. Al stadıonnyń qaq ortasyndaǵy saxnada ártister tamasha shoý baǵdarlamany kórsetti. Uıymdastyrýshylar káris xalqynyń ulttyq salt-dástúrin, ýaqyttyń eshkimge baǵynbaıtyn kúshin, dostyq pen birlikti sheber jetkize bildi. Phenchhan Olımpıadasynyń talısmany - Sýxoran atty jolbarystyń beınesin de drondar arqyly ádemi kórsetti.
Saltanatty shara barysynda Halyqaralyq Olımpıada komıtetiniń tóraǵasy Tomas Bax áıelder arasyndaǵy 30 shaqyrymdyq mass-startta jeńimpaz atanǵan Marıt Borgenge altyn medaldi tabystady. Norvegııalyq sportshy osymen Olımpıdanyń segiz dúrkin chempıony atanyp otyr. Pxenchxanda ol eki altyn, bir kúmis jáne eki qola utyp aldy. Erler arasyndaǵy mass-startta fın sportshysy jeńiske jetti. Al Reseıdiń eki shańǵyshysy kúmis pen qolany qanaǵat tutty. Olardy da HOK basshysy quttyqtap, medal tapsyrdy.
«Bıylǵy Aq Olımpıadada Ońtústik Koreıa men Soltústik Koreıanyń sportshylary birge shyǵyp, tatýlyq pen dostyqty pash etti. Olımpıada qozǵalysynyń negizgi maqsaty da sol, sport arqyly birlikti kúsheıtý, xalyqtar dostyǵyn nyǵaıtý. Búgin Olımpıadanyń alaýy sónse de, bizdiń dostyqty kúsheıtý jolyndaǵy qyzmetimiz jalǵasa beredi», - dedi T.Bax.
Kelesi Olmıpıada oıyndary 2022 jyly Qytaıdyń Beıjiń qalasynda ótedi.
Aıta keteıik, Ońtústik Koreıada ótken XXIII qysqy Olımpıada oıyndarynda Qazaqstan quramasy bir ǵana júlde - qola medaldy jeńip aldy. Ony el qorjynyna frıstaılshy ıÝlııa Galysheva salǵan bolatyn.
Jalpy, osy jolǵy Olımpıada oıyndarynda Qazaqstannan 46 sportshy sporttyń 9 túrinen el namysyn qorǵady. Atap aıtqanda, bıatlonshylar Vasılıı Podkorytov, Maksım Braýn, Vladıslav Vıtenko, Tımýr Hamıtgatın, Roman Eremın, Alına Raıkova, Darıa Klımına, Galına Vıshnevskaıa, Olga Poltoranına jáne Elızaveta Belchenko sprınt, izge túsý, jekeleı saıys, mass-start, aralas estafeta jáne estafetada óner kórsetti.
Frıstaılda 9 sportshymyz boldy. Mogýlda - Dmıtrıı Reıherd, Pavel Kolmakov, ıÝlııa Galysheva jáne Aıaýlym Ámrenova, akrobatıkada jarysynda - Marjan Aqjigit, Janbota Aldabergenova, Aıana Joldas, Aqmarjan Qalmurzaeva jáne Ildar Badrýtdınov, shańǵy jarysynda - Alekseı Poltoranın, Denıs Volotka, Evgenıı Velıchko, Vıtalıı Pýhkalo, Valerııa Tıýleneva, Anna Shevchenko men Elena Kolomına, short-trekte - Nurbergen Jumaǵazıev, Abzal Ájiǵálıev, Denıs Nıkısha, Erkebulan Shamuhanov, Mersaıd Jaqsybaev, Anastasııa Krestova men A Iong Kım, al konkı tebýde - Roman Krech (500, 1000 m), Stanıslav Palkın (500, 1000, 1500 m), Artem Krıkýnov (500 m), Fedor Mezentsev (1000, 1500 m, mass-start), Denıs Kýzın (1000, 1500 m) jáne Ekaterına Aıdova (500, 1000, 1500 m), taý shańǵysynda - Igor Zakýrdaev pen Marııa Grıgoreva, al Nıkıta Kopyrenko shana sportynan synǵa tússe, Sergeı Tkachenko tramplınnen sekirýden baq synady. Osy joly mánerlep syrǵanaýda alǵash ret úsh birdeı sportshymyz óner kórsetti. Olar -Denıs Ten, Elızabet Tursynbaeva jáne Aıza Mambek. Alaıda birde-bireýi júldege ilige almady. Osylaısha, Qazaqstan quramasy osydan tórt jyl buryn Reseıdiń Sochı qalasynda ótken Olımpıadanyń jetistigin qaıtalady. Ol medaldi Denıs Ten jeńip alǵan bolatyn.
Phenchhanda bir qazaq qyzynyń Olımpıada chempıony atanǵanyn da erekshe atap ótken jón. Dınara Álimbekova Belarýs quramasynyń sapynda bıatlonnan 4h6 shaqyrym estafetalyq jarystyń jeńipazy boldy. Dınara 1996 jyly 5 qańtarda Qaraǵandy oblysy Abaı aýdanynda dúnıege kelgen. 3 jasynda otbasymen Belarýstiń Chaýsy qalasyna qonys aýdarǵan. Onyń ákesi - qazaq, anasy - belarýs. Ózinen keıin Evgenıı atty inisi bar.
Alǵashynda Dınara shańǵy sportymen aınalysqan. 2008 jyly bıatlonǵa aýysady. Sol jyly respýblıkalyq «Snejnyı snaıper» jarysynda jeńimpaz atanǵan. Shańǵy jarysy boıynsha Belarýs birinshiliginde, halyqaralyq saıystarda (2009) jáne jazǵy bıatlon boıynsha respýblıkalyq spartakıadada (2011) chempıon atanǵan. Al Phenchhan Olımpıadasyndaǵy jeńisten keıin Belarýs prezıdenti Aleksandr Lýkashenko Dınara Álimbekovany arnaıy nagradamen marapattady.
Aıta ketken jón, bıylǵy Olımpıadada rekordtar kóp boldy. Al Norvegııa quramasy medal sany jaǵynan jańa rekord ornatty. Atalǵan eldiń quramasy barlyǵy 39 medaldy jeńip aldy. Qazaqstan bir qola medalmen jalpykomandalyq esepte 28-orynda jaıǵasty.
Foto: Danııar Maılybaev