Ońtústik Koreıanyń memlekettik qyzmet salasyndaǵy ozyq tájirıbesi zerdelenýde
Astana Memlekettik qyzmet haby basqarýshy komıtet tóraǵasy Álıhan Baımenov Koreıa Respýblıkasy Adam resýrstaryn basqarý boıynsha mınıstri Kım Syn Homen kezdesti.
Olar birlesken zertteýler jasaý, sarapshylardyń kezdesýler, ǵylymı-saraptamalyq jarııalanymdarmen almasý, sondaı-aq memlekettik qyzmet mádenıeti, ádep jáne sybaılas jemqorlyqtyń aldyn alý turǵysyndaǵy ozyq koreı tájirıbesin zerdeleý tetikterin talqylady. Álıhan Baımenov Koreıanyń ekonomıkalyq tabysynyń negizgi faktorlarynyń biri retinde kásibı memlekettik qyzmetiniń joǵary rólin atap ótti. Kezdesý sońynda taraptar Hab pen mınıstrlik arasyndaǵy Yntymaqtastyq týraly memorandýmǵa qol qoıdy. Kezdesýge qatysýshylardyń aıtýynsha, memorandýmǵa qol qoıý memlekettik qyzmetti jetildirý maqsatynda birlesken is-sharalardyń óńir elderi úshin jańa múmkindikterin ashady.
Álıhan Baımenov sondaı-aq Ulttyq aqparattyq qoǵam agenttiginiń (NIA) prezıdenti Djongsýng Hvanmen jáne Koreıanyń ishki ister jáne qaýipsizdik mınıstrligi (MOIS) Qoǵamnyń jasandy ıntellekt máseleleri jónindegi tsıfrlyq úkimet bıýrosy Bas dırektory Hýang Kýı Chýlmen kezdesý ótkizdi.
Taraptar tsıfrlandyrý jáne ınnovatsııalar salasyndaǵy memlekettik qyzmetshilerdiń áleýetin arttyrý jónindegi birlesken óńirlik jobany jańa óńirlerde, atap aıtqanda, Shyǵys Eýropa men Balqan túbegi elderinde jalǵastyrý jáne keńeıtý perspektıvalaryn qarastyrdy. Olar buǵan deıin MOIS mınıstri Lı Sang Mınmen áriptestiktiń jańa aspektileri týraly ýaǵdalastyqty taǵy bir ret talqylap, rastady jáne óńir elderiniń tsıfrlyq áleýetin arttyrý úshin jaǵdaı jasaýǵa múddeli ekendikterin bildirdi.
Qazirgi ýaqytta Koreıa tarapy qarjylandyratyn óńirlik jobany Koreıa Respýblıkasynyń Іshki ister jáne qaýipsizdik mınıstrligi, NIA, BUUDB jáne Hab Ortalyq Azııa men Kavkazdyń jeti eliniń memlekettik qyzmetshileri úshin iske asyrýda.
Ótken jyldan bastap joba aýyqymynda 6 onlaın jáne offlaın is-shara ótkizildi, onyń ishinde zertteýler, elektrondyq úkimet, ınnovatsııalar men memlekettik qyzmetterdi tsıfrlandyrý salasyndaǵy ozyq tájirıbeni zerdeleý óńir elderiniń memlekettik qyzmetshileri tarapynan joǵary baǵaǵa ıe boldy.
Aıta ketsek, Koreıa Respýblıkasynyń Úkimeti qarjylandyratyn Ortalyq Azııa jáne Kavkaz elderiniń memlekettik organdary ókilderi úshin tanystyrý sapary Koreıa Respýblıkasynyń Іshki ister jáne qaýipsizdik mınıstrligi (MOIS), Koreıa Respýblıkasynyń Ulttyq aqparattyq qoǵam agenttigi (NIA), BUU Damý Baǵdarlamasy (BUUDB) jáne Astana Memlekettik qyzmet haby (Hab) birlesken jobasy sheńberinde uıymdastyryldy.