Ońtústik Koreıaǵa jumys isteýge baratyn qazaqstandyqtardy aldyn ala daıyndaıdy

ASTANA. QazAqparat – Ońtústik Koreıaǵa eńbek etý jáne biliktiligin arttyrýǵa baratyn otandastarymyzǵa atalǵan eldiń zańdylyqtary men tártibi úıretiledi. Bul týraly Eńbek jáne halyqty áleýmettik qorǵaý mınıstrligi kóshi-qon komıteti tóraǵasynyń mindetin atqarýshy Іlııas Ispanov málim etti, dep habarlaıdy QazAqparat tilshisi.

«Ońtústik Koreıaǵa eńbek etýge baratyn qazaqstandyqtardy aldyn ala daıyndaımyz. Birinshiden til máselesi. Odan ári ol eldiń zańdylyqtary men tártibi jáne ózin-ózi ustaý, júrý-turý jaǵyn úıretemiz. Osylaısha otandastarymyz Ońtústik Koreıada eńbek etip nemese biliktiligin kótere alady. Jýyrda Úkimet basshysynyń birinshi orynbasary R.Sklıar bastaǵan delegatsııa koreıalyq kompanııalar men zaýyttardy elimizde ashý máselesin talqylap, sheshim qabyldandy», - dedi Eńbek jáne halyqty áleýmettik qorǵaý mınıstrligi kóshi-qon komıteti tóraǵasynyń mindetin atqarýshy Іlııas Ispanov ortalyq kommýnıkatsııalar qyzmeti alańynda ótken baspasóz máslıhatynda.

Buǵan deıin habarlaǵanymyzdaı, qazaqstandyqtardyń Ońtústik Koreıada eńbek etip, qyzmet atqarýy máselesin ekijaqty kelisim arqyly zańdastyrý qaralyp jatyr.

Eske salaıyq, ótken jylǵy 1 sáýirden bastap qazaqstandyqtar Ońtústik Koreıaǵa vızasyz bara alady.