Ońtústik Koreıaǵa zańsyz kirgen eki qazaqstandyqqa sot úkimi shyqty

ASTANA. QazAqparat – Ońtústik Koreıaǵa zańsyz kirip, áýejaıdan qashqan eki qazaqstandyqqa sot úkimi shyqty. Olar aıyppul tólep, elge qaıtatyn boldy, dep habarlaıdy QazAqparat.

Bul týraly olardyń advokaty Meıirjan Shekeev habarlady.

«Bul Qazaqstannyń halyqaralyq taǵy bir bedeldi jeńisi. Endi Koreıadaǵy eki jigit 3 jylǵa túrmege toǵyttalmaı, aıyppul tólep, elge qaıtatyn boldy. Aıtar, jazar nárseler óte kóp. Biraq áli bitiretin sharýalar jetip jatyr. Alla qalasa amandyqta júzdeseıik», - dep jazdy qorǵaýshy Instagram jelisinde.

Eske salaıyq, naýryzdyń sońynda eki otandasymyz Ońtústik Koreıaǵa kirýge tyıym salynǵanyna qaramastan atalǵan elge zańsyz aıaq basqany týraly habarlaǵan edik.

10 sáýir kúni Ońtústik Koreıaǵa zańsyz kirgen jerlesterimiz tergeý ızolıatorynda qamaýda otyrǵany belgili boldy.

Sottyń alǵashqy otyrysy mamyr aıynyń ortasyna josparlandy.