Ońtústik Koreıadaǵy Samsung jaǵdaıy Qazaqstandaǵy ókildik jumysyna yqpalyn tıgizgen joq

ALMATY. QazAqparat - Ońtústik Koreıada Samsung Group keńselerindegi jaǵdaı Qazaqstandaǵy ókildik jumysyna esh yqpalyn tıgizgen joq, dep habarlady QazAqparat tilshisine Samsung brend-kommýnıkatsııasynyń Qazaqstandaǵy departament jetekshisi Alısa Ýılıams.

«Samsung shtab-páterindegi oqıǵa týraly ázirge pikir bere almaımyz. Biraq, Qazaqstandaǵy ókildik ádettegideı, esh qıyndyqsyz jumys isteýde», - dedi ol.

Eske sala ketsek, Ońtústik Koreıa prokýratýrasynyń Samsung Group keńselerinde tintý júrgizip jatqany habarlanǵan edi. Kompanııa saıası daý-damaı ortasynda qalǵan el prezıdentiniń jaqyn adamy Chhve Sýn Sılmen baılanysy bar dep aıyptalýda.

Saıası daý-damaı Chhve Sýn Sıl Ońtústik Koreıa prezıdenti Pak Kyn Hege el aldynda sóıleıtin sózderiniń mátinin jazyp beredi degen qaýesetterden bastaldy. Chhve Sýn Sılge memlekettik iske aralasty degen aıyp taǵylyp otyr.  

Atap ótken jón, bul álemge tanymal koreılik kompanııalarǵa qatysty birinshi oqıǵa emes. Qyrkúıek aıynyń sońynda Lotte Group mańaıynda janjal shyqty. Ońtústik Koreıa prokýratýrasy kompanııa top-menedjerin para berdi jáne 181 mln dollar jymqyrdy dep aıyptady. 2014 jyly Ońtústik Koreıanyń Lotte Confectionery kompanııasy «Raxat» AQ-nyń barlyq aktsııalaryn satyp alǵan bolatyn. 2013 jyldyń 23 jeltoqsanynan 2014 jyldyń 15 qańtaryna deıin «Raxat» AQ kompanııasynyń aktsııalary boıynsha kelissózder júrdi. «Rahatqa» tıesili barlyq 855 myń 133 aktsııa Lotte menshigine ótti. «Raxat» Qazaqstanda 70 jyldan beri kondıterlik ónimder shyǵarýmen aınalysatyn iri kompanııalardyń biri.