Ońtústik Koreıada jıynda júrgen QQK áskerı qyzmetshileri óz tańdaýyn jasady (FOTO)

ASTANA. QazAqparat - QR Qorǵanys mınıstrliginiń Armııa ortalyq sport klýby taekvondoshylar komandasynyń áskerı qyzmetshileri Qazaqstan Respýblıkasy Prezıdentiniń saılaýyna birinshi bolyp qatysty.

Bul týraly QR Qorǵanys mınıstrliginiń baspasóz qyzmeti habarlady.

Qazirgi ýaqytta olar Ońtústik Koreıanyń Inchhon qalasyndaǵy jıynda Dúnıejúzilik armııashylardyń sporttyq oıyndaryna daıyndalýda. Daýys berý úshin olardyń barlyǵy Seýl qalasyna jol tartty, onda aldyn ala arnaıy saılaý ýchaskesi qurylǵan bolatyn. Aıta ketý kerek, ýaqyttyń aıyrmashylyǵyna baılanysty kún shyǵys elinde júrgen qandastarymyz 5 saǵat buryn óz tańdaýyn jasap úlgerdi.

«Men Qazaqstan Respýblıkasyna qyzmet etemin, sondyqtan da Prezıdent saılaýyna qatysýdy óz boryshym dep sanaımyn. El bolashaǵy onyń azamattarynyń qolynda bolǵandyqtan, árbir qazaqstandyqtyń daýysy óte mańyzdy», - deıdi QR QM AOSK áskerı qyzmetshisi Almas Múkamanov.

Taekvondodan QR Qarýly Kúshteri komandasynyń quramynda QR QM AOSK áskerı qyzmetshileri Ánýar Úsenov, Almas Múkamanov, Islamǵalı Ábýov, Marat Ábdiqalıev, Rýslan Japarov, Mereke Júnisova jáne Sultan Qalıbekuly bar.

Osy kezde, Ońtústik Koreıadan bólek, Reseıde, Belarýste, Ýkraınada, Túrkııada, AQSh-ta, Qytaıda, Ulybrıtanııada, Germanııa men Úndistanda júrgen 400 den astam áskerı qyzmetshimiz daýys berýde. Osyǵan oraı atalǵan elderdiń iri qalalarynda ýaqytsha saılaý ýchaskeleri qurylǵan.