Ońtústik Koreıada sý astynda qalǵan týnnelden 13 adamnyń denesi tabyldy
Birneshe kún tolassyz jaýǵan jańbyrdan keıingi tasqyn sýdyń jerasty ótkeline tez quıylǵany sonsha, jolaýshylar men júrgizýshiler qashyp shyǵa almaı, kóliginde qalyp qoıǵan.
Elde sý tasqyny, kóshkin jáne elektr qýatynyń úzilýinen kem degende 39 adam qaza tapqan.
Toǵyz adam iz-túzsiz ketti.
Osong qalasyndaǵy uzyndyǵy 685 metr týnnelde qansha adam qamalyp qalǵany belgisiz, biraq 15 kólik sý astynda qaldy dep boljanyp otyr.
Birneshe adamnyń máıiti avtobýs ishinen shyǵaryldy. Senbi kúni aman qalǵan toǵyz adam qutqaryldy.
Zardap shekkenderdiń otbasy jergilikti bılik shuǵyl ári tez áreket etkende ólimniń aldyn alýǵa bolatyn edi deıdi.
Jergilikti BAQ jazýynsha, qaıǵyly oqıǵadan birneshe saǵat buryn tasqynǵa qarsy kúres basqarmasy sý deńgeıiniń mejeden asyp ketkenin eskertken, sondyqtan týnnel mańyndaǵy kólik qozǵalysynyń baǵytyn ózgertý kerek edi.
Qalǵan ólim-jitim búkil úılerdi kóshkin alyp ketken taýly Soltústik Kensan aımaǵynda boldy.
Senbi kúni Ońtústik Koreıada shamamen 300 mm jaýyn jaýdy.
Koreı meteorologııa qaýymdastyǵynyń málimetinshe, ádette jylyna 1000-1800 mm jańbyr jaýady, onyń kóp bóligi jaz aılaryna tuspa-tus keledi.
Sý tasqynynan zardap shekken aýdandardan túsirilgen aerofotosýretterden qońyr laı men tasqyn sýdyń mol bolǵanyn kórýge bolady, sýdan úılerdiń shatyry ǵana shyǵyp tur.
Jergilikti ákimshilikter kesh qabyldaǵan evakýatsııa týraly buıryqtan myńdaǵan adam zardap shekti.
Premer-mınıstr Han Dak Sý áskerılerden qutqarý jumysyna kómektesýdi surady.
Agenttiktiń habarlaýynsha, senbi kúni tańerteń Soltústik Chýnchhondaǵy Gosan bógeti tola bastaǵanda shamamen 6400 turǵyn evakýatsııalanǵan.
Bógetke jaqyn ornalasqan birqatar aýyldar men olardy baılanystyratyn joldar sý astynda qalyp, keı turǵyndar úıinde qalyp qoıdy.
Juma kúni keshke qaraı kóshkinniń saldarynan Soltústik Chýnchhonda poıyz relsten shyǵyp ketti.
Bir ınjener zardap shekti, degenmen poıyzda bul ýaqytta jolaýshylar joq edi.