Ońtústik Koreıada óz atyna kelgen «jumbaq» sálemdemeni ashqan úsh adam aýrýhanaǵa tústi
Jergilikti polıtsııa bólimshesine senbi kúni Seýlden ońtústikke qaraı 85 shaqyrym jerdegi Chhonandaǵy úıge Taıvannan plastık paketke oralǵan belgisiz joldama kelgeni týraly aqparat tústi.
Oqıǵa ornyna birden polıtsııa men jarylystyq-tehnıkalyq top keldi. Rentgenmen skanerleý arqyly paket ishinde belgisiz gaz bar ekeni anyqtalyp, olar kúdikti paketti ary qaraı tergeý úshin alyp ketti.
Bul keıingi birneshe kúnde Soltústik Koreıanyń túkpir-túkpirine kelgen 1 600-den astam kúdikti halyqaralyq joldamalardyń sońǵysy boldy.
Olardyń ishinde qaýipti ári ýly materıaldar bar dep qoryqqanymen, mundaı zattar joq bolyp shyqty.
Joldamalardyń kóbinde eringe arnalǵan balzam men basqa da arzan ónimder bolǵan, al keıbir sálemdemeler bos boldy.
Polıtsııa onlaın-dúken platformalaryndaǵy saýdagerler adamdardyń jeke aqparatyn zańsyz alyp, tapsyrys bermegen taýarlardy jiberýi múmkin deıdi. Mundaı amal saýda kólemin arttyryp, ınternet-dúken saıttaryndaǵy saýdagerlerdiń reıtıngine manıpýlıatsııa jasaýǵa baǵyttalǵan.
Bılik ókilderi kúdikti halyqaralyq sálemdemeler kelgende muqııat bolýǵa shaqyrdy. Olar mundaı sálemdemelerdiń túsi sary nemese qara bolýy jáne Taıvannan jiberilýi múmkin ekenin aıtty.
Bılik ókilderi mundaı joldamalar áýeli Qytaıdan jiberilip, Taıvanda az ýaqyt aıaldaǵannan keıin Ońtústik Koreıaǵa jetkizilgenin anyqtady.
Kúdikti halyqaralyq sálemdemeler týraly habar beısenbi kúni Taıvannan kelgen kezdeısoq sálemdeme ońtústik-shyǵystaǵy Ýlsan qalasyndaǵy múgedekterge arnalǵan áleýmettik qamtamasyz etý ortalyǵyna jetkizilgennen keıin túse bastady, dep jazdy Yonhap.
Sálemdemeni ashatyn nysanda jumys istegen úsh adam basy aınalyp, tynysy tarylǵandyqtan aýrýhanaǵa jiberildi.
Polıtsııa olarǵa sálemdemedegi ýly gaz áser etýi múmkin dep kúdiktendi.
Biraq, memlekettik qorǵanys zertteý agenttigi júrgizgen tekseris joldamada qaýipti eshteńe bolmaǵanyn kórsetti.