Ońtústik Koreıada nóser jaýyn saldarynan 49 adam qaıtys boldy nemese iz-túzsiz joǵalyp ketti

SEÝL. QazAqparat – Ońtústik Koreıanyń ortalyq bóliginde sý basyp qalǵan jerasty jolynan taǵy da tórt adamnyń máıiti tabylyp, nóser jaýyn saldarynan qaza tapqan nemese iz-túzsiz joǵalyp ketkender sany 49-ǵa jetti, dep habarlaıdy QazAqparat Yonhap agenttigine silteme jasap.

Senbi kúni nóser jaýynnan keıin jaqyn mańdaǵy ózen arnasynan asyp, Chhondjý qalasyndaǵy Osong jerasty jolyn sý basyp qalǵan. Saldarynan 15 kólik, onyń ishinde avtobýs sý astynda qaldy.

Túnde taǵy tórt adamnyń máıiti tabylyp, qaza tapqandar sany 13 adamǵa jetti.

Tabıǵat apattarymen kúres jáne qaýipsizdik sharalary ortalyq basqarmasynyń aqparaty boıynsha, elde 39 adam, onyń 19-y ońtústik-shyǵystaǵy Soltústik Kensan provıntsııasynda nóser jaýyn saldarynan qaza tapty.

Tańǵy 6-daǵy jaǵdaı boıynsha toǵyz adam iz-túzsiz joǵalǵandar qatarynda, onyń tórteýi Soltústik Kensan provıntsııasynda, 34 adam jaraqat aldy.

Qurbandar sany artýy múmkin, sebebi qutqarýshylar sý basyp qalǵan jerasty jolyn qurǵatý operatsııasyn jalǵastyryp jatyr. Onda boljam boıynsha, 10 avtokólik sý astynda qalǵan.

Elde 10 570 adam óz úılerinen evakýatsııalandy.

Nóser jaýyn 628 qoǵamdyq nysan men 317 basqa da jeke nysandy búldirdi, onyń ishinde 146 jol opyryldy nemese sý shaıyp ketti, 139 úı sý astynda qaldy.

28 607 úı jaryqsyz qaldy. Dúısenbidegi jaǵdaı boıynsha, bul úılerdiń kóbinde jaryq qaıta qosyldy.

Seısenbi Chhýnchhonda jáne ońtústik óńirlerde 200 mm-ge deıin, eldiń basqa bóliginde 10-nan 100 mm-ge deıin jaýyn-shashyn túsýi múmkin.

Osyǵan deıin Ońtústik Koreıada jańbyrdan qaza tapqandar sany 32 adamǵa jetkeni habarlandy.