Ońtústik Koreıada kóligimen bala qaqqan qazaqstandyqqa qatysty ekinshi sot otyrysy kelesi aıda ótedi

NUR-SULTAN. QazAqparat – Ońtústik Koreıada kóligimen bala qaqqan qazaqstandyqqa qatysty kelesi sot otyrysy jeltoqsan aıynyń ortasynda ótedi. Bul týraly QR SІM resmı ókili Aıbek Smadııarov málim etti, dep habarlaıdy QazAqparat tilshisi.

«Alǵashqy sot otyrysy ótti. Sot otyrysynda Qazaqstan azamatynyń anasy da qatysty. BAQ-ta jarııalanǵandaı, ol sotta keshirim surady. Kelesi sot otyrysy shamamen jeltoqsan aıynyń ortasynda ótedi», - dedi Aıbek Smadııarov SІM-de ótken baspasóz máslıhatynda.

QR SІM resmı ókili qazaqstandyq jas jigitke naqty qandaı jaza kesiletinin sot sheshetinin atap ótti.

«Ázirge tek taraptar tyńdaldy», - dedi ol.

Eske sala ketsek, 16 qazan kúni qazaqstandyq azamat Ońtústik Koreıada kishkentaı balany kóligimen qaǵyp, sol elden qashyp ketken. Ol bul memlekette bir jyldam astam ýaqyt boıy zańsyz turyp kelgeni anyqtaldy. Keıin ol óz erkimen Seýl qalasyna qaıtyp oraldy.

Búgingi tańda ol Chanvon qalasyndaǵy tergeý ızolıatorynda jatyr.

Sondaı-aq, Ońtústik Koreıada kóligimen bala qaqqan qazaqstandyqqa birneshe aıyp taǵylǵan bolatyn.