Ońtústik Koreıada qazaqstandyqtardy jumystan qýyp jatyr – feık

ASTANA. QazAqparat – «Ońtústik Koreıada qazaqstandyqtardy jumystan shyǵaryp jatyr». QR Syrtqy ister mınıstrliginiń resmı ókili Aıbek Smadııarov bul aqparattyń jalǵan ekenin aıtty, dep habarlaıdy QazAqparat tilshisi.

Áleýmettik jelide «eki qazaqstandyqtyń Ońtústik Koreıa shekarasyn zańsyz kesip ótý oqıǵasynan keıin sondaǵy otandastarymyzdy jumystan shyǵara bastady» degen aqparat jarııalandy.

«Ońtústik Koreıada qazaqstandyqtardy jumystan shyǵaryp jatyr» degen aqparat shyndyqqa janaspaıdy. Ol áleýmettik jelidegi pablıkterdiń birinde jarııalandy. Paraqshany júrgizetin bloger bul «jańalyqtyń» qaıdan shyqqanyn túsindire almady. Ókinishke qaraı, keıbir qazaqstandyq BAQ bul aqparatty naqtylamaı jarııalady. Osy oraıda, Syrtqy ister mınıstrliginiń resmı aqparatyna súıenýdi jáne qajetsiz dúrbeleń týdyrmaýdy suraımyz», - dep jaýap berdi Aıbek Smadııarov QazAqparat tilshisine.

Sondaı-aq, SІM resmı ókili Ońtústik Koreıa shekarasyn zańsyz kesip ótken eki qazaqstandyqtyń taǵdyryna qatysty jergilikti polıtsııadan habar kútip otyrǵanyn jetkizdi.

Eske salsaq, osydan birer kún buryn eki otandasymyz Ońtústik Koreıaǵa kirýge tyıym salynǵanyna qaramastan, atalǵan elge zańsyz kirip ketken edi. Syrtqy ister mınıstrligi habarlaǵandaı, kóp uzamaı onyń bireýi ustalyp, ekinshisine izdeý salyndy.

Aıta ketsek, eki qazaqstandyqtyń áreketi Ońtústik Koreıada qoǵamdyq rezonans týdyryp, jergilikti BAQ-ta keńinen jarııalanǵany aıtyldy. Keıin belgili bolǵandaı, Inchhon áýejaıynan qashyp ketken ekinshi qazaqstandyq polıtsııaǵa óz erkimen berildi.