Ońtústik Koreıada 3 qazaqstandyq jalǵan qujat jasaý kúdigimen tutqyndaldy

ASTANA. QazAqparat – Ońtústik Koreıada Qazaqstannyń 3 azamaty sheteldikterge jalǵan qujat jasady degen kúdikke ilindi. Bul týraly Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

«Koreıa Respýblıkasynyń ımmıgratsııalyq bıligi aqparatyna sáıkes, 12 aqpan kúni Qazaqstannyń úsh azamaty ustaldy. Onyń ekeýi tutqynǵa alynyp, úshinshisi elden ketpeý týraly qolhatpen bostandyqqa jiberildi. Atalǵan máselege qatysty is jergilikti prokýratýraǵa joldanǵan. Azamattar bosqyn mártebesin alýǵa arnalǵan ótinimge jalǵan tarıh jasaý jáne áleýmettik jeli arqyly sheteldikterge, onyń ishinde Qazaqstan azamattaryna jekelegen qujattardy daıyndaý kúdigine iligip otyr», - dedi resmı ókil vedomstvoda ótken aptalyq brıfıng barysynda.

Onyń atap ótýinshe, tergeý barysynda olardyń Koreıa aýmaǵynda turatyn birneshe sheteldikke bosqyn mártebesin berý týraly ótinimdi ótirik bergeni anyqtaldy.

«Ońtústik Koreıanyń quqyq qorǵaý organdary «Jeke málimetterdi qorǵaý týraly» koreı zańyna sáıkes Qazaqstan Elshiligine ustalǵandar týraly jeke málimetterdi jáne ózge de aqparattardy berýden bas tartty. Buǵan qosa, ustalǵan Qazaqstan azamattary Seýldegi Elshiligimizge júgingen joq jáne Elshilik qyzmetkerlerine aqparat berýge múddeli emes», - dedi Aıbek Smadııarov.