Ońtústik Koreıa mamany qazaqstandyq bochchashylardy jarysqa daıyndap jatyr
Qazaqstannyń bochcha quramasy 18-24 tamyz aralyǵynda Polshada ótetin «Poznan 2023 World Boccia Challenger» halyqaralyq jarysyna qatysady.
Sportshylardyń daıyndyǵyna kómektesý úshin Qazaqstan bochcha federatsııasy Ońtústik Koreıadan halyqaralyq sarapshy Chol Hen Kvondy shaqyrǵan. Sheteldik maman bochchashylarǵa 1 apta boıy, aldymen, teorııa, sodan soń praktıka túrinde sheberlik sabaq ótkizdi.
Búgin Parlament Senatynyń tóraǵasy – Qazaqstan bochcha federatsııasynyń prezıdenti Máýlen Áshimbaev halyqaralyq dodada el namysyn qorǵaıtyn sportshylarmen kezdesti.
«Bochcha – endi damyp kele jatqan jańa sport túri. Munda olımpıadalyq qaǵıdat bar: eń bastysy – qatysý. Bıylǵy jarysta júldeli orynǵa ıe bolmaýymyz da múmkin. Biraq, aldaǵy ýaqytta halyqaralyq arenada el namysyn abyroımen qorǵaıtyn bolamyz. Ol úshin bizge kóp jattyǵyp, daıyndalý kerek. Halyqaralyq bilikti sarapshylardy shaqyrý qajet. Eger biz álemdik deńgeıde óner kórsetkimiz kelse, halyqaralyq jattyqtyrýshylarmen tájirıbe almasýymyz kerek», - dedi Máýlen Áshimbaev sportshylarmen sóılese turyp.
Bochchashylar oqý-jattyǵý daıyndyqtaryn elordadaǵy Paralımpıada ortalyǵynda ótkizip jatyr.
«Qazir bochchadan Polshadaǵy halyqaralyq jarysqa oqý-jattyǵý jıyndary ótýde. Sportshylardyń daıyndyǵyn arttyra túsý úshin ońtústikkoreıalyq sarapshy shaqyryldy. Sarapshy bochchanyń ádis-tásil, qyr-syryn úıretip, tájirıbe bólisip jatyr. Chol Hen Kvon – bul salada álemge tanymal adam. Sportshylarymyzdy jarysqa daıyn dep aıtýǵa bolady. Degenmen qobaljý bar, sebebi bul halyqaralyq deńgeıdegi alǵashqy sapar. Atalǵan halyqaralyq dodada tórt synyp boıynsha 6 sportshy el namysyn qorǵaıdy», - deıdi ulttyq bochcha quramasynyń bas bapkeri Dıana Moldahmetova.