Ońtústik Koreıa QHA tájirıbesine qyzyǵýshylyq tanytty
Sapar barysynda QHA delegatsııasynyń Ulttyq Assambleıa (Parlament) depýtaty Shın Sýng Bom myrzamen jáne Koreıanyń jetekshi joǵary oqý oryndarynyń biri - Kongýk ýnıversıtetiniń basshylyǵymen kezdesý bolyp, onda Seýl qalasynda Qazaq mádenıeti men yntymaqtastyǵy ortalyǵyn qurý máseleleri talqylandy.
Taraptar bul ortalyqtyń Kongýk ýnıversıtetiniń bazasynda qurylyp, jumys isteýi týraly pikir almasty.
E.Toǵjanov Shet tilderi ýnıversıtetiniń (HUFS, Enın qalasy) stýdentteri men oqytýshy-professorlar quramyna arnap «Qazaqstan halqy Assambleıasy - beıbitshilik pen dostyq qyzmetindegi 20 jyl» taqyrybynda dáris oqydy.
E.Toǵjanovtyń dúnıejúzilik «KBS World - Radio» radıosyna bergen suhbatynda aıtylǵan N.Nazarbaevtyń qoǵamdyq kelisim men birlik modelin ilgeriletýdegi QHA-nyń róline koreı qaýymdastyǵynyń qyzyǵýshylyǵyn týdyrdy.
Sapar barysynda delegatsııa músheleri Koreıa Respýblıkasy Ulttyq Assambleıasynyń «Senýrı» bıleýshi partııasynan saılanǵan Jasmın Lı hanymmen kelissóz júrgizdi.
Depýtat Qazaqstanda etnosaralyq qatynastardy damytýdaǵy QHA-nyń tájirıbesine, Nursultan Nazarbaev modeliniń qalyptasý men damýyna úlken qyzyǵýshylyq tanytty. Jasmın Lı hanym QHA sııaqty uıym qyzmetiniń ereksheligin atap kórsete otyryp, biregeı tájirıbeni Koreıa Respýblıkasynda engizý qajettigi týraly pikirin bildirdi. Jasmın Lı hanym Qazaqstandaǵy kóp etnosty qoǵam týraly kóbirek tanyp-bilýi úshin Qazaqstan halqy Assambleıasy Tóraǵasynyń orynbasary - QR Prezıdenti Ákimshiliginiń Hatshylyq meńgerýshisi Eraly Toǵjanov ony Qazaqstanǵa kelip ketýge shaqyrdy.
Sondaı-aq delegatsııa músheleriniń Koreıada bilim alyp jatqan qazaqstandyq stýdenttermen kezdesýi boldy. Kezdesý barysynda Koreıanyń jetekshi ýnıversıtetteriniń stýdentteri men magıstranttary QHA qyzmeti, etnomádenı birlestikter týraly suraqtar qoıyp, ózderiniń Koreıadaǵy oqýlary men stýdenttik ómirlerinde qol jetkizgen tabystary týraly aıtty.
Koreıa tehnologııalar jáne zertteýler ınstıtýtynyń QHA delegatsııasyna arnalǵan tanystyrylymy da jemisti formatta ótti. Sapar barysynda delegatsııa músheleri Koreıamen ózara qurmet pen senimge negizdelgen dostyq jáne tatý kórshilik qatynastardy damytý beıbitshilik pen turaqtylyqty nyǵaıtý, eki memlekettiń budan ári strategııalyq seriktestikte bolýy úshin jańa múmkindikter ashatynyna taǵy da kóz jetkizdi.