Ońtústik Koreıa Qazaqstanǵa ınvestıtsııa quıýdy azaıtty
Bul týraly elordada ótken Qazaqstan men Ońtústik Koreıanyń yntymaqtastyq forýmynda Koreıanyń «KOTRA» saýda jáne ınvestıtsııalar boıynsha agenttiginiń basshysy Kang Sang Ep málimdedi.
Agenttik basshysy Qazaqstanǵa ınvestıtsııalar tartý jumysyn kúsheıtý qajet dep pikir bildirdi jáne qazaqstandyq zańnamanyń aıqyndyǵy men sottyń biliktiligine qatysty alańdaýshylyqty, jemqorlyq, teńgeniń devalvatsııaǵa ushyraý qaýpi sekildi ońtústikkoreıalyq bıznesmender jıi kez bolatyn máselelerdi atap kórsetti. Sondaı-aq, olar ınvestıtsııalanatyn múliktiń qaýipsizdigine, tutynýshylardyń satyp alý qabiletine jáne qazaqstandyq standarttar men normalardyń turaqtylyǵyna nyq senimdi emes.
Sondaı-aq, «KOTRA» ókili ınvestıtsııalyq ahýaldy jaqsartý boıynsha Qazaqstan Úkimeti júrgizip jatqan jumystardyń nátıje bererine senim bildirdi jáne sońǵy eki jylda Ońtústik Koreıanyń Qazaqstanǵa quıǵan ınvestıtsııalar kólemi aıtarlyqtaı tómendegenin aıǵaqtaıtyn derekterdi keltirdi.
Agenttik basshysy keltirgen derekterge sáıkes, dıplomatııalyq qarym-qatynas ornaǵan sátten beri Koreıanyń Qazaqstanǵa quıǵan ınvestıtsııalar 2 mlrd 580 mln dollarǵa jetken. 2012 jyly elektr, gaz jáne sýmen jabdyqtaý jobalaryna salynǵan ınvestıtsııalar kólemi 180 mıllıon dollardy qurasa, 2010 jyldan búginge deıingi ınvestıtsııalar kólemi 880 mln dollarǵa jetken.
«Birte-birte ósip kele jatqan ınvestıtsııalar kólemi 2015 jyly qysqara tústi jáne 2016 jyly nebári 7 mln dollardy kórsetti. Kóbinese taý-ken ónerkásibi, óndiris, qurylys jáne aqparattyq qyzmetter salalaryna qarjy ınvestıtsııalanǵan. Al 2017 jyldyń qańtar-naýryz aılarynda Qazaqstanǵa salynǵan koreıalyq ınvestıtsııalar kólemi 2 mıllıon 800 myń dollardy ǵana qurap otyr», - dedi ol.
Qazaqstanda óndiris, saýda jáne qurylys salalarynda 465 ońtústikkoreılik kompanııa jumys isteıdi. Sonymen qatar, hımııalyq ónerkásip, energetıka, qurylys, avtomobıl óndirisi jáne medıtsına salalarynda koreıalyq-qazaqstandyq 27 birlesken kásiporyn jumys isteıdi.