Ońtústik Koreıa Qazaqstan ekonomıkasyna 8,5 mlrd dollar ınvestıtsııa saldy

ASTANA. QazAqparat- Ońtústik Koreıa - Qazaqstandaǵy eń iri 10 ınvestor eldiń biri. Osy kúnge deıin atalǵan memleket elimizdiń ekonomıkasyna 8,5 mlrd dollar ınvestıtsııa quıǵan. Tolyǵyraq QR Premer-Mınıstriniń orynbasary – Syrtqy ister mınıstri Murat Nurtileý aıtyp berdi, dep habarlaıdy QazAqparat tilshisi.

«Qazaqstan men Ońtústik Koreıa arasynda mazmundy ári turaqty saıası dıalog ornaǵan. Kóptegen óńirlik jáne halyqaralyq máseleler boıynsha ustanymdarymyz uqsas. Ásirese, kópjaqty dıplomatııada ózara qoldaý jolǵa qoıylǵanyn erekshe atap ótken jón. Saýda men ekonomıka salasyndaǵy yntymaqtastyq jyl sanap qarqyndy damyp keledi. Ońtústik Koreıa - Qazaqstandaǵy eń iri 10 ınvestordyń biri jáne Azııa qurlyǵyndaǵy aýqymy jaǵynan ekinshi saýda seriktesimiz», - dedi Murat Nurtileý Ońtústik Koreıa Respýblıkasynyń syrtqy ister mınıstri Pak Jınniń elimizge sapary barysynda uıymdastyrylǵan brıfıngte.

Mınıstrdiń aıtýynsha, bolashaqta eki memleket te ınvestıtsııa kólemin ulǵaıtýǵa múddeli.

«Osy ýaqytqa deıin Ońtústik Koreıa Respýblıkasy Qazaqstan ekonomıkasyna 8,5 mlrd dollar ınvestıtsııa quıdy. Byltyr bul úrdis jalǵasyp, bir jylda onyń kólemi 1,5 mlrd dollar boldy. Bul - ekijaqty ınvestıtsııalyq yntymaqtastyq tarıhyndaǵy eń joǵary kórsetkish. Qazaqstanda kólik jasaý, qurylys, munaı-hımııa, azyq-túlik jáne taǵy basqa salalarda «KIA», «Hyundai», «Lotte», «POSCO», «SK» sııaqty koreı bıznesiniń qatysýymen 740 kompanııa tirkelgen. Olar birlesken 28 iri jobany júzege asyryp jatyr», - deıdi ol.

Buǵan deıin habarlaǵanymyzdaı, Ońtústik Koreıa prezıdenti ıÝn Sok El resmı saparmen Qazaqstanǵa keledi.