Ońtústik Koreıa ballıstıkalyq zymyran ushyrǵan Soltústik Koreıany aıyptady

ASTANA. QazAqparat- Ońtústik Koreıa Respýblıkasynyń syrtqy ister mınıstri Pak Jın Soltústik Koreıanyń uzaq qashyqtyqqa ballıstıkalyq zymyran ushyrýyna qatysty málimdeme jasady, dep habarlaıdy QazAqparat tilshisi.

«Búgin tańerteń Soltústik Koreıa BUU qaýipsizdik keńesiniń qararlaryn aıqyn buzyp, sondaı-aq Koreı túbeginiń jáne búkil álemniń beıbitshiligi men turaqtylyǵyna qaýip tóndiretin eleýli arandatýshylyq sanalatyn «spýtnık ushyrý» degen syltaýmen uzaq qashyqtyqqa ballıstıkalyq zymyran ushyrdy. Biz atalǵan eldiń bul isin aıyptaımyz. Soltústik Koreıa kelissóz ústeline oralady degen úmitimiz bar», - dedi Pak Jın elimizge sapary barysynda uıymdastyrylǵan baspasóz máslıhatynda.

Buǵan deıin birqatar BAQ Soltústik Koreıa óziniń alǵashqy ǵaryshtyq spýtnıgin orbıtaǵa shyǵarý úshin ballıstıkalyq zymyran ushyrǵanyn habarlaǵan edi.

Zymyran ushqannan keıin kóp uzamaı teńizge qulady. Ońtústik Koreıa áskerıleri zymyrannyń radar ekrandarynan tez joǵalyp, qulaǵanyn rastady.

Keıin zymyran qaldyqtary Koreı túbeginiń batysyndaǵy Sary teńizge túsken. Taldaýǵa sáıkes, zymyran rasymen de ǵaryshtyq spýtnıkti ushyrýǵa arnalǵan.

Eske salsaq, buǵan deıin Ońtústik Koreıa syrtqy ister mınıstriniń Qazaqstanǵa resmı saparmen keletinin habarlaǵan edik.

Aqorda málimetinshe, búgin Memleket basshysy Qasym-Jomart Toqaevtyń Ońtústik Koreıa Respýblıkasynyń syrtqy ister mınıstri Pak Jınmen kezdesýi josparlanǵan.