Ońtústik Koreıa Atyraý oblysymen medıtsına salasynda áriptestikti nyǵaıtpaq

ATYRAÝ. QazAqparat –Atyraý oblysyna saparmen kelgen Ońtústik Koreıanyń elshisi Atyraý óńirimen yntymaqtastyqty arttyrýǵa nıetti ekenin bildirdi, dep habarlaıdy QazAqparat.

Atyraý oblysynyń ákimi Mahambet Dosmuhambetov Ońtústik Koreıa Respýblıkasynyń Tótenshe jáne ókiletti elshisi Ký Hong Sokty qabyldady. Taraptar kezdesýde eki el arasyndaǵy yntymaqtastyq pen ekijaqty saýda-ekonomıkalyq qatynas týraly sóz qozǵady.

«Qazaqstan Respýblıkasy Táýelsizdik alǵannan beri eki el arasynda dostyq qarym-qatynaspen qatar, saýda jáne ekonomıkalyq qatynastar da qalyptasty. Osy oraıda ekijaqty yntymaqtastyqty odan ári nyǵaıtýǵa nıettimiz. Bul oraıda, ásirese, koreı ınvestıtsııasyn tartýǵa múddelimiz», - dedi oblys ákimi Mahambet Dosmuhambetov.

Sondaı-aq, ákim munaıly óńir úshin Ońtústik Koreıanyń munaı-hımııa ónerkásibin qarqyndy damytý tájirıbesiniń mańyzyn atap ótti.

«Munaı-hımııa ónerkásibin damytý baǵytynda Ońtústik Koreıanyń tájirıbesi mol ekeni anyq. Osy baǵytta ekijaqty tájirıbe almassaq, bul bolashaqta birlesken kásiporyndar qurý úshin negiz bola alady», - dedi Mahambet Dosmuhambetov.

Ońtústik Koreıa Respýblıkasynyń elshisi Ký Hong Sok munaı-gaz salasynda birqatar birlesken joba júzege asyp jatqanyna toqtaldy. Aldaǵy ýaqytta medıtsına salasynda da áriptestik tanytýǵa nıet bildirdi.