Ońtústik Qazaqstanda jańa sý elektr stansasy iske qosyldy

ASTANA. QazAqparat - Búgin Ońtústik Qazaqstan oblysyndaǵy Saıram aýdanynda «Mankent» shaǵyn sý elektr stansasy iske qosyldy, dep habarlaıdy QazAqparat óńir basshysynyń baspasóz qyzmetine silteme jasap.

Halyqty turaqty ári sapaly elektr energııasymen qamtıtyn sý elektr stansasynyń ashylýyna oblys ákimi Janseıit Túımebaev pen «Aqsý-Energo» JShS-niń dırektory Anarbek Orman qatysty.

«Aqsý Energo» JShS-niń bul jobasy «Bıznestiń jol kartasy 2020» baǵdarlamasy aıasynda qoldaý tapty. Bul nysan jylyna 2,5 MVt  elektr qýatyn óndirýge qaýqarly. Joba quny - 283 mln.teńge, kásiporynda 6 adam jumyspen qamtylǵan.

Oblysta kún, jel, sý energııasynyń áleýeti joǵary ekenin aıtqan ákim, dástúrli energııa kózderimen qatar, jańa energetıkany da damytý qajettigin atap ótti.
 

«Ózderińizge belgili, bıyl Astana qalasynda «Bolashaq energııasy» taqyrybynda EKSPO-2017 halyqaralyq mamandandyrylǵan kórmesi ótip jatyr. Álemdik deńgeıde ótkizilip jatqan kórme tehnıkalyq jetistiktermen, jańǵyrmaly energııa kózderiniń moldyǵymen, ǵylymǵa umtylýdyń mańyzdylyǵymen búkil álemniń nazaryn aýdarýda. Memleket basshysy N.Á.Nazarbaev 2050 jylǵa deıin jańǵyrmaly energııa úlesin 50 paıyzǵa deıin kóbeıtýdi qamtamasyz etýdi tapsyrdy. Búgin iske qosylǵan elektr stansasy taza elektr energııa óndirýmen qatar, energoresýrstardy únemdeýge baǵyttalǵan»,-dedi ákim óz sózinde.

Jalpy «jasyl ekonomıkaǵa» kóshý jónindegi  tujyrymdamaǵa sáıkes, Saıram aýdanynda  2 joba iske qosylyp otyr.

«Aqsý Energo» JShS 2014 jyly «Kún nurynan elektr qýatyn óndiretin qýattylyǵy 1MVt bolatyn «Aqbaı» elektr stansasyn iske qosqan bolatyn. Quny 300 mln.teńge bolatyn elektr stansasy 2016 jyly 987,166 MVt energııa kózin óndirdi.

Eki joba tolyq qýatyna shyqqan kezde aýdannyń energııa kózine degen suranysynyń altydan birin qamtamasyz etetin bolady.