Ońtústik Qazaqstanda omartashylar kooperatıvi qurylady

ASTANA. QazAqparat - Ońtústik Qazaqstan oblysynda omartashylar kooperatıvi qurylady. Bul óz kezeginde ishki týrızmdi damytyp, sheteldik týrısterdi kóptep tartýǵa septigin tıgizedi. Sondaı-aq omartashylardyń ujymdasyp jumys isteýine yqpal etetin bolady. Bul týraly Ońtústik Qazaqstan oblysynyń ákimi Janseıit Túımebaev Qazyǵurt aýdanyna jasaǵan jumys saparynda málim etti, dep habarlaıdy QazAqparat.

Qazyǵurt aýdanynyń tabıǵaty omartashylar úshin óte qolaıly. Taýly  óńirde búginde bal arasyn ustaıtyn jeke kásipkerlerdiń sany 20-ǵa jýyqtaıdy. Olardyń arasynda Shymkent qalasy men Saryaǵash aýdanynan kelip, qolaıly jer tańdap, bal óndirip otyrǵandar da az emes. Solardyń biri saryǵashtyq Sergeı Marınkov 10 jyldan beri omartashylyqpen aınalysyp keledi. Ol búginde Qazyǵurt aýdany Sabyr Raqymov  aýyl okrýgi mańyndaǵy jol boıynda ara ustap, tabıǵı taza ónim óndirip otyr. Oblys ákimi aýdanǵa sapary barysynda Sergeıdiń omartasyna toqtap, jumysymen tanysty.

 «Omartashy bolý - jaqsy kásip. Tabıǵattyń keremet jerinde bal arasyn ósirip, taza tabıǵı ónim alyp otyrǵan osyndaı omartashylarǵa qoldaý bildirip, basyn qosyp,  kooperatıv qurý qajet. Sonda ǵana jumys júıelenip, omartashylyq kásipti damytýǵa jol ashylady. Sondyqtan aldaǵy ýaqytta ońtústiktegi omartashylardyń basyn qosyp, aldaǵy josparlaryn talqylaıtyn bolamyz», - dedi Janseıit Qanseıituly.

Sergeı Marınkov oblys ákiminiń bul usynysyn qoldaıtynyn jetkizip, bal óndirý isindegi jyldyq tabysynyń qupııasymen bólisti.

«Omartashylyqpen inim, ákem -  úsheýmiz aınalysamyz. Saryaǵash aýdanynan arnaıy kelip, osynda ornalastyq. Búginde balymyzdyń bir kelisin 1500 teńgeden bosatyp jatyrmyz. Jalpy bir maýsymda 3,5 tonnadaı bal óndiremiz», - deıdi Sergeı Marınkov.

Óńir basshysy aldaǵy ýaqytta qazyǵurttyq baldy brendke aınaldyrýdyń jolyn qarastyrý qajettigine toqtaldy. Óńirimizge keletin týrısterge baldy qoljetimdi etý úshin oblys ortalyǵyndaǵy qonaqúılerge bal ónimderin pakettep usyný kózdelip otyr.