Ońtústik Qazaqstanda din men dástúrdi arqaý etken alqaly jıyn ótti
Basqosýda din men dástúr taqyrybynda ashyq pikir almasý bolyp, usynystar aıtyldy. Aımaq basshysy Janseıit Túımebaev is-sharaǵa jınalǵan kópshilikti qasıetti Ramazan aıymen quttyqtap, taqyryp aıasynda oıyn ortaǵa saldy.
«Elbasymyzdyń «Bolashaqqa baǵdar: rýhanı jańǵyrý» baǵdarlamalyq maqalasynda rýhanı jańǵyrýdy - «tarlan tarıhtyń, jasampaz búgingi kún men jarqyn bolashaqtyń kókjıekterin úılesimdi sabaqtastyratyn ult jadynyń tuǵyrnamasy» dep atap kórsetti. Din de, dástúr de, qoǵam da tynyshtyq pen tatýlyqtyń, birlik, yntymaq pen syılastyqtyń saltanat qurýyna qyzmet etedi. Qazaqy sanadaǵy «uıat», «obal», «saýap», «qut», «kıe», «amanat», «ynsap» sekildi irgeli uǵymdar ulttyq tárbıemizde altyn tindeı úzilmeı, ǵasyrlar boıynda jalǵasyp keledi. Ásirese, sońǵy jyldary asyl dindi ulttyq dástúrmen úılestire ustanýdyń mańyzy arta túsýde», - dedi Janseıit Túımebaev.
Sondaı-aq, keleli kezdesýde óńir basshysy qazirgi tańda din men dástúr sabaqtastyǵy artyp, toı-tomalaq pen dinı rásimderde ysyrapqa jol bermeýge kóńil bólinip jatqandyǵyn jetkizdi.
«Meshitter belgilengen tártippen salynyp, janaza rásimindegi jónsiz áreketter de bir izge keltirilýde. Jer-jerlerde «Aqyldastar alqasy» qurylyp, bedeldi azamattardyń qatysýymen arnaıy kezdesýler uıymdastyrylýda. Búginde oń isti qoldaýshylar kóbeıip jatyr. Munyń bári ilgerileýdiń, qoǵamda durys dinı sana qalyptasa bastaǵandyǵynyń kórinisteri», - dedi aımaq basshysy.
Sonymen qatar, oblys ákimi jastarǵa soqyr senimge salynyp syńarjaq ketip qalmaı, ǵylym men ónerge, mádenıet pen órkenıetke qaraı umtylatyn kezeń ekendigin qadap aıtty.
Jıyn barysynda sondaı-aq Qazaqstan musylmandary dinı basqarmasynyń óńirdegi ókil ımamy men birqatar azamattar taqyryp tóńireginde oılaryn ortaǵa saldy.