Ońtústik Qazaqstanda 600-den astam kooperatıv iske qosylady

ShYMKENT. QazAqparat - Ońtústik Qazaqstan oblysynda 2017-2020 jyldary ishinde 90 myń jeke sharýa qojalyqtarynan quralǵan 600-den astam kooperatıvter naqty iske kirisedi. Bul týraly oblys ákimi Janseıit Túımebaev halyq aldynda ótken esepti jıynda aıtty, - dep habarlaıdy QazAqparat HAA tilshisi.

«Elbasy bıylǵy jylǵy Qazaqstan halqyna arnalǵan Joldaýynda agroónerkásip keshenin ekonomıkanyń jańa draıverine aınaldyrý mindetin qoıyp otyr. Osy baǵytta, sharýa qojalyqtary men jeke qosalqy sharýashylyqtar kiristerin arttyrý, ónimin ótkizý, saqtaý kózdelýde. Óndiris quraldarymen jáne materıaldyq-tehnıkalyq resýrstarmen jabdyqtaý, qarjylandyrýǵa qol jetkize alý úshin kooperatıvter júıesin jetildirip, óńirlik basymdylyǵyna qaraı agro aımaqtar quratyn bolamyz. Etti, sútti mal sharýashylyǵyn órkendetý men qus, balyq sharýashalyǵyn damytý qosa júrgiziledi», - dedi óńir basshysy.

Máselen, 2017 jyldyń ózinde mal bordaqylaý alańdary bar 30 jekelegen qosalqy sharýashylyq biriktiriletin bolady. Osylardyń biri «Qaıyp ata» mekemesi janynan 2 myń maldy bordaqylaıtyn «Hanshaıym» kooperatıvi qurylyp, jylyna óndiriletin 1 myń tonna ónim tolyǵymen eksportqa jóneltiledi. Sonymen qatar, bıyl 3 myńnan astam otbasynyń 30 myńnan asa iri qara maldy bordaqylaıtyn alańy men 723 januıalyq sút fermasyn ashý josparlanýda. Sonymen birge, sút ónimdiligin arttyrý baǵytynda «Qazyna jer LTD» mekeme janynan 2 600 bas iri qara maldy ustaıtyn  6 kooperatıv uıymdastyrylyp, jylyna 8 myń tonna sút óndirý kózdelýde. Al, «Atameken» korporatsııasy Tóle bı aýdanynda  20 sharýashylyqty biriktirip, 400 basqa arnalǵan sút óndirý kooperatıvin qolǵa aldy.

Al, qus etin óndirý úshin ústimizdegi jyly 56 myń qusqa shaqtalǵan 14 ferma  ashylady. Budan bólek, «Shymkent qus» mekemesi men qarjy ınstıtýttarynyń qoldaýymen Tóle bı aýdanyndaǵy 20-dan astam sharýa qojalyǵy birigedi.

Sonymen qatar, osy jyly balyq sharýashylyǵy boıynsha 7 balyq óndirý kásipornyn qurý josparlanýda.   Qazyǵurt, Tóle bı, Saıram aýdandarynda qarqyndy alma, jańǵaq baýlary men Shymkent qalasy jáne Saryaǵash aýdanynda jylyjaı kesheni agro aımaqtaryn qosý  kózdelýde.

Nátıjesinde 90 myń jeke sharýa qojalyqtarynan quralǵan 600-den astam kooperatıvter naqty iske kirisedi. Búgingi kúni jańadan 17 myńnan astam usaq sharýashylyqtardy biriktiretin 242 kooperatıv quryldy.