Ońtústik kásipkerleri taýarlaryn tómengi baǵada usyndy

ShYMKENT. QazAqparat - Ońtústik Qazaqstan oblysynda 1 mamyr - Qazaqstan halyqtarynyń birligi kúni merekesine oraı otandyq taýar óndirýshilerdiń jármeńkesi ótti. Memlekettik baǵdarlama aıasynda óz kásibin dóńgeletken 60 kásipker kelýshilerge ózderiniń taýarlaryn tómengi baǵada usyndy, dep habarlaıdy QazAqparat tilshisi.

Alǵash ret jumyspen qamtý baǵdarlamasynyń qatysýshylarymen ótken jármeńkeni oblys ákimdigi men «Damý» qory, «Ońtústik» AIO jáne «Yrys» mıkroqarjy uıymdary uıymdastyrdy. «Eńbek» jappaı kásipkerlik baǵdarlamasy qatysýshylarynyń jármeńkesinde et jáne sút ónimderi, jemis-jıdek, kókónister men qolóner sheberleriniń buıymdary satyldy.

Merekelik jármeńke bolǵandyqtan munda oıyn-saýyq jáne kontserttik shoý-baǵdarlamalar qoıylyp, syılyqtar utysy uıymdastyryldy. Sondaı-aq, satyp alýshylarǵa lotereıa bıletteri taratylyp, jeńimpazdarǵa jármeńke alańynda ǵana jaramdy aqshalaı kýpondar tabystaldy.

Aıta keteıik, «Eńbek» jappaı kásipkerlik baǵdarlamasynyń arqasynda «Damý» qory arqyly Ońtústik Qazaqstan oblysy boıynsha 150 bastaýysh jáne aǵymdaǵy kásipkerler óz isin ashyp, keńeıtý múmkindigine ıe boldy. Jalpy qarjylandyrý kólemi 1,4 mlrd. teńgeni qurady. Al, «Yrys» mıkroqarjy uıymy 2017 jyly atalǵan baǵdarlama aıasynda «Damý» kásipkerlikti qoldaý qory men «Agrarlyq nesıe korporatsııasy» AQ arqyly jalpy 900 mln. teńge qarajat tartyp, nátıjesinde 180 jańa jumys orny qurylǵan 191 jobany qarjylandyrdy.

Aıta ketý kerek, Agrarlyq nesıe korporatsııasynan tartylǵan qarajat aýyl turǵyndaryna taratylsa, «Damý» qorynan bólingen qarajat arqyly Kentaý, Túrkistan jáne Shymkent qalalarynyń turǵyndary nesıelendirildi.