Ońtústik Qaraturyn ken ornyndaǵy órt qyrkúıekte sónýi múmkin

AQTAÝ. QazAqparat – Mańǵystaý oblysyndaǵy «Ońtústik Qaraturyn» ken ornyndaǵy órt qyrkúıekte sónýi múmkin. «Bozashy munaı» kompanııasy 9 maýsymnan beri janyp jatqan otqa qatysty osyndaı boljam jasap otyr, dep habarlaıdy QazAqparat tilshisi.

Kompanııa gaz fontanyn joıýǵa 300 mıllıon teńgeden astam qarjy jumsaǵan. Tótenshe jaǵdaıǵa baılanysty shyǵyn kóbeıýi múmkin. Mamandar merdiger mekeme qajetti qujattardyń joqtyǵynan órt oshaǵyndaǵy kólbeý uńǵymalardy burǵylaı almaı otyrǵanyn aıtady.

«Tehnıkalyq turǵydan bári daıyn. Keshe ónerkásiptik qaýipsizdik ınspektorlary, ekologııa departamenti mamandarynyń qatysýymen iske qosý komıssııasy boldy. Ónerkásiptik qaýipsizdik mamandary bizden kóbirek burǵylaý eritindisin daıyndaýdy surady. Bul burǵylaý úshin qajet jáne qosymsha qujattar paketin de usyndy. Keıbir qaǵazdar daıyn bolmady. Burǵylaý kompanııasynyń mamandary, bizdiń merdigerler qujattardy tolyǵymen daıyndap tapsyrýy kerek», - dedi «Bozashy munaı» JShS bas dırektorynyń strategııalyq damý jónindegi orynbasary Danııar Dúısembaev.

Esterińizge sala keteıik, órt «Ońtústik Qaraturyn» munaı-gaz ken ornynda 9 maýsym saǵat 3.25-te uńǵymany burǵylaý jumystary kezinde, №303 uńǵymadaǵy burǵylaý quraly kóterilip ketip, jer astynan gaz-sý qospasy atqylaýy sebebinen shyqqan. Bir adam zardap shekti.

Kásibı áskerılendirilgen avarııalyq-qutqarý qyzmetteriniń respýblıkalyq ortalyq shtabynyń bólimshesi jasaqtaǵan lınııa boıynsha 13 maýsymda 302 tekshe metr eritindi tógildi.