Ońtústik Afrıkada koronavırýs juqtyrýshylar sany ósti - DDU

NUR-SULTAN. QazAqparat – Dúnıejúzilik densaýlyq saqtaý uıymy Ońtústik Afrıkada koronavırýs aýrýynyń kóbeıýine sebep bolǵan omıkronnyń eki jańa shtammy týraly málimdedi, dep habarlaıdy QazAqparat uıymnyń saıtyna silteme jasap.

«BA.4 jáne BA.5 shtammdary neǵurlym aýyr belgilerdi týdyra ma, joq pa, ony naqty bilýge áli erte. Biraq bul –pandemııanyń aıaqtalmaǵanynyń taǵy bir belgisi», - dep málimdedi DDU bas dırektory Tedros Adanom Gebreısýs 4 mamyrda ótken baspasóz máslıhatynda.

DDU sáýir aıynyń ortasynda BA.4 jáne BA.5 shtammadaryn baqylaı bastady. Olar buryn anyqtalǵan BA.1 jáne BA.2 shtammdarynyń qosymsha túri. Sońǵysy qazir búkil álemde keńinen taralyp jatyr.
Uıymnyń málimetinshe, sáýir aıynyń sońynda Ońtústik Afrıkada bir táýlikte COVID-19 juqtyrýdyń 2650 deregi tirkelgenin habarlady. Biraq 1 mamyrda 6500-den astam koronavırýs juqtyrýshylar tirkelgen. Olardyń sany ósýde.
Jańa shtammdarǵa qaramastan, Gebreısýs COVID-19 jaǵdaılarynyń sany búkil álemde tómendegenin jáne pandemııa alǵash bastalǵan kezde 2020 jyldyń naýryzynan bastap apta saıynǵy ólim-jitim azaıyp bara jatqanyn aıtty.
Sonymen qatar DDU basshysy koronavırýsqa test tapsyrý asa mańyzdy bolyp qala beretinin atap ótti.