Óńirlik kadr rezervi: Ulytaý oblysynyń ákimi kandıdattarmen suhbattasty

<p>JEZQAZǴAN. KAZINFORM &ndash; Memleket basshysynyń tapsyrmasyna sáıkes barlyq óńirde uıymdastyrylǵan irikteýdiń Ulytaý oblysynda da sońǵy kezeńi aıaqtaldy. Bul týraly oblys ákimdiginiń baspasóz qyzmeti málimdedi.</p>

Jas menedjerler pýlyn qalyptastyrýǵa, talantty jastardy tartýǵa baǵyttalǵan jobanyń oblys úshin mańyzy erekshe. QR Memlekettik qyzmet isteri agenttiginiń Ulytaý oblysy boıynsha departamenti jáne Ulytaý oblysynyń ákimdigi birlese ótkizgen is-sharaǵa oblys ákimi, komıssııanyń tóraǵasy Berik Ábdiǵalıuly qatysyp, barlyq kandıdatqa sáttilik tiledi. 

Foto: Ulytaý oblysy ákimdigi

«Elge qyzmet etý, onyń ishinde týǵan jerge eńbek sińirý – óte jaýapty da saýapty mindet. Kózinde jarqyraǵan oty bar sizderdeı jastar – Ulytaý oblysynyń jáne elimizdiń bolashaǵy. Konkýrsqa túskende sizder kúrdeli tapsyrmalardy oryndap, ınnovatsııalyq sheshimder usyna bildińizder. Bul sizderge ártúrli salalarǵa jol ashýǵa múmkindik beredi. Alda endi óz jobalaryńyzdy qorǵaısyzdar. Osy óte mańyzdy jáne jaýapty synaqtan súrinbeı, tabyspen ótýlerińizge tilektespin», - dedi óńir basshysy óz sózinde.

Aıta keteıik, osy jyldyń naýryzynda bastalǵan irikteýge 70-ten astam azamattan ótinim kelip túsip, 30-ǵa jýyǵy sońǵy kezeńge joldama aldy. Al onyń 20-sy oblystyń bolashaq damýy jolynda óz ıdeıalaryn iske asyrý úshin kadr rezervine alynady. 

Foto: Ulytaý oblysy ákimdigi