Óńirlerdegi memlekettik qyzmetshilerdiń jalaqysyn kóterý usynyldy

<p>ASTANA. KAZINFORM &ndash; Búgin Senatta óńirlerdiń bıýdjettik derbestigi taqyrybyna arnalǵan dóńgelek ústel otyrysynda Qaraǵandy oblysy ákiminiń orynbasary Ermek Alpysov memlekettik qyzmetshilerdiń jalaqysyn kóterýge qatysty usynys aıtty.</p>

«Mańyzdy máselelerdiń biri jergilikti atqarýshy organdar men revızııalyq komıssııalardaǵy memlekettik qyzmetshilerdiń jekelegen sanattaryna jalaqy deńgeıiniń tómendigine qatysty. Statıstıkaǵa qaraǵanda, Qaraǵandy oblysynda 2023 jyldaǵy ortasha jalaqy 367 myń teńgeni, al Qazaqstan boıynsha 394 myń teńgeni qurady. Bul rette, oblysymyzdaǵy iri kásiporyndarda myqty mamandar 800 myńnan 1 mıllıon teńgege deıin tabys alady. Aýdandyq deńgeıdegi A blogyndaǵy bas mamannyń laýazymdyq jalaqysy eńbek ótiline qaraı eń kóp degende 260 myń teńge, oblystyq deńgeıde 302 myń teńge shamasynda. Sońǵy ret qyzmetkerlerdiń laýazymdyq jalaqysyn kóterý 2021 jyldyń 1 shildesinde júzege asyryldy», - dedi E. Alpysov.

Onyń aıtýynsha, qazir memlekettik qyzmette jaqsy kadrlardyń aýysýy jıiledi. Adamdar tájirıbe jınaqtap, jalaqysy joǵary jumysqa ketip jatyr.

«Biz jalaqyny kem degende elimizdegi ortasha aılyq (394 myń teńge) deńgeıine deıin jetkizý máselesin qarastyrýdy usynyp otyrmyz. Sondaı-aq memlekettik qyzmetshilerdiń jumysyn baǵalaý nátıjeleri boıynsha bonýs mólsherin eki jalaqydan tórt jalaqyǵa deıin arttyrýdy usyndyq», - dedi Qaraǵandy oblysy ákiminiń orynbasary.