Óńir ákimderi aýa raıy boljamyna jiti nazar aýdarmaǵan – Erlan Nysanbaev

<p>ASTANA. KAZINFORM &ndash; Óńir ákimderi sý tasqyny qaýpine tıisti deńgeıde baǵa bermegen. Bul týraly Úkimet otyrysynda Ekologııa jáne tabıǵı resýrstar mınıstri Erlan Nysanbaev aıtty.</p>

«Ótken jyldyń kúzinde jaýyn-shashyn kóp túsip, bul topyraqtyń aıtarlyqtaı ylǵaldanýyna sebep boldy. Sodan keıin qatty aıaz áserinen topyraqtyń qatýy baıqaldy. Qys kezindegi mol jaýyn-shashynnan keıingi erý qardyń qalyńdyǵynda jáne topyraq betinde muz qabattarynyń paıda bolýyna ákeldi. Joǵaryda atalǵan faktilerdi eskere otyryp, jeltoqsan aıynyń ózinde óńirler bólinisinde sý tasqyny qaýpi bar ýchaskeler aıqyndaldy. Jeltoqsan, aqpan jáne naýryz aılarynyń basyndaǵy boljamdarda kórsetildi jáne ákimdikter men ortalyq organdarǵa joldandy», - dedi ol.

Mınıstrdiń aıtýynsha, 15 naýryzdan bastap búgingi kúnge deıin Qazgıdromet 100-den astam daýyl boıynsha eskertý jarııalady. Olar habarlaý shemasyna sáıkes jergilikti atqarýshy jáne ortalyq memlekettik organdarǵa jiberildi jáne qazirgi kezde de joldanyp jatyr.

«Alaıda, ákimdikter boljamǵa qajetti deńgeıde nazar aýdarmady, osy sebepti sý tasqyny qaýpine tıisti baǵa berilmedi jáne ýaqtyly aldyn alý sharalary qabyldanbady», - dedi Erlan Nysanbaev.