Onlaın sanaqqa qandaı qosymsha arqyly qatysýǵa bolady
Bul týraly Úkimet otyrysynda Ulttyq statıstıka bıýrosynyń basshysy Nurbolat Aıdapkelov málim etti.
«Sanaq eki tásilmen júrgiziledi: 45 kún boıy sanaq.gov.kz mamandandyrylǵan saıtynda ınternet-saýal salýdy júrgizý jáne elektrondy planshet paıdalanyp ıntervıýerler dástúrli jappaı saýalnama júrgizedi. Oǵan qosa Aitu Messenger otandyq mobıldi qosymshasy arqyly sanaqtan ótý múmkindigi beriledi. Budan bólek egov.kz elektrondy úkimet saıtynyń basty betinde sanaq.gov.kz siltemesi bar. Sol silteme boıynsha ótip, onlaın rejımde sanaq paraqtaryn toltyrýǵa bolady», - dedi bıýro basshysy.
Onyń aıtýynsha, sanaqqa atsalysqysy kelgen turǵyndar Halyqqa qyzmet kórsetý ortalyqtarynda, ákimdikterde, poshta bólimshelerinde, mektepter men saýda ortalyqtarynda ornalasatyn arnaıy uıymdastyrylǵan nusqaýshylyq ýchaskelerde sanaqtan óte alady. Onda aıtylǵan derekterdiń qamtylýyn jáne durystyǵyn tekserý úshin respondentterdiń 10%-yn baqylap aralap ótý josparlanyp otyr.
«2021 jylǵy 1 qyrkúıekten bastap Qazaqstanda halyq sanaǵy bastalady, ol 1 qyrkúıekten 15 qazan aralyǵynda onlaın rejımde jáne 1-30 qazan aralyǵynda planshetterde ótedi. Búgingi kúnde barlyq daıyndyq is-sharalary ótkizildi. Negizgi halyq sanaǵyn ótkizýge daıyndyq sheńberinde pılottyq halyq sanaǵy júrgizildi. Sanaqtyń ádisnamalyq quraldary men NQA ázirlendi jáne bekitildi. 2021 jylǵy 1 maýsym men 30 maýsym aralyǵynda turǵyn jáne turǵyn emes úı-jaılardyń mekenjaılaryn, sondaı-aq olarda turatyn halyqtyń naqty sanyn naqtylaý boıynsha sanaqtyń dalalyq jumystary júrgizildi», - degen Nurbolat Aıdapkelov aldyn ala saýalnama júrgizýshiler búginge deıin 6 mıllıonnan astam sanaq obektisin qamtyǵanyn jetkizdi.
«1-kezeńniń qorytyndylary boıynsha aýdandastyrý, ıaǵnı el aýmaǵyn nusqaýshylyq jáne esep ýchaskelerine bólý aıaqtaldy. Qazir jappaı túsindirý jumystary júrgizilip jatyr», - dedi Ulttyq statıstıka bıýrosynyń basshysy.