Onlaın sabaqtaǵy porno: Almaty ákimdigi túsinik berdi

ALMATY. QazAqparat - Almatyda «ZOOM» platformasy arqyly ótken sabaǵy ústinde porno kórsetkenderge qatysty ákimdik túsinik berdi, dep habarlaıdy QazAqparat tilshisi.

7 qyrkúıekte mektep dırektory S.Aıdarovanyń atyna matematıka muǵalimi A.K. Tasylbaevadan túsinikteme túsken.

Muǵalim «ZOOM» platformasynda onlaın sabaq berip jatqanda belgisiz bireýler buzyp kirip bylapyt sóz aıtyp, kámelettik jasqa tolmaǵan balalarǵa pornografııalyq sıpattaǵy foto, vıdeolardy kórsetken.

Mektep dırektory birden bul derek týraly Almaly aýdandyq polıtsııa basqarmasyna habarlady.

«Qazir polıtsııa sotqa deıingi tergeý isi reestrinde №207511035003305 is tirkedi. Pedagog ujymymen ujymdyq túsindirý jumystary júrip jatyr. Mektep ákimshiligi jaqynda oqý platformasyn qaýipsizdigi joǵary sapaly platformaǵa aýystyrýdy oılastyryp jatyr»,- dedi ákimdikten.

Eske salsaq, dál osyǵan uqsaıtyn oqıǵa Nur-Sultan qalasynda da tirkelip, polıtsııa matematıka sabaǵynda pornografııalyq slaıd kórsetken adamdy izdep jatyr.