Onlaın oqytýdy paıdalanyp aýyl jastarynyń bilim sapasyn kóterýge bolady – volonter
«Biz Táýelsizdikpen birge ósip-óngen jastarmyz. Memleket tarapynan jastarǵa qoldaý kórsetilip, jeke damýyna jaǵdaı jasalsa eken. Jastardyń ózi oqyǵan mamandyǵy boıynsha tabys kózi az, sondyqtan mamandyǵy boıynsha jumys istegisi kelmeıdi. Tipti mamandyq boıynsha jumysqa turǵysy kelse de jumys ótili bolýyn talap etedi, al oqýdy endi ǵana bitirgen jasta jumys ótili qaıdan bolsyn? Osy oraıda jastar tarapynan usynys: aýyl sharýashylyǵy mamandarynyń aýylǵa baryp jumys isteıtin baǵdarlamasy ázirlense deımiz», - deıdi «Aýyl» partııasy jastar qanatynyń múshesi Aman Ámirhanov.
«Aýyl» partııasy Qaraǵandy oblysy boıynsha óńirlik fılıalynyń jastar qanatynyń belsendisi, qazaq tili men ádebıeti pániniń muǵalimi Araı Qarataeva onlaın oqý – aýyl jastary úshin jańa múmkindik ekenin aıtty.
«Karantın kezinde egde jastaǵy ustazdar úshin jańa tehnologııalardy qoldaný qıyn boldy. Ýaqyt óte kele úırendi. Qalada oqıtyndar úshin qıyndyq bolǵan joq, sebebi qalada ınternet jelisi jaqsy jumys isteıdi. Qalada oqıtyn oqýshylardyń 90%-y qosymsha bilimge júginedi, al aýylda ondaı múmkindik joq. Qaraǵandy oblysy jastary osyndaı máseleni sheshý úshin jalpyulttyq jobany qolǵa aldyq. Maqsatymyz – aýyldaǵy oqýshylardy kompıýterlik saýattylyqqa, aǵylshyn tilinde jaqsy sóıleýge úıretý jáne UBT-ǵa daıyndaý. Osy tájirıbede onlaın oqytýdyń tıimdiligin baıqadyq. Osy joba boıynsha oblysymyzda 93 volonter oqytýshy jumys istep jatyr. 743 aýyl oqýshysy osy jobada júıeli túrde bilim alýda. Onlaın oqytýdy paıdalanyp aýyl jastarynyń bilim sapasyn kóterýge bolady», - deıdi ol.