Onlaın qurban shalý: Muqtaj jandarǵa et úlestirýge volonterler qajet

NUR-SULTAN. QazAqparat – Qazaqstan Musylmandary dinı basqarmasynyń tóraǵasy, Bas múftı Naýryzbaı qajy Taǵanuly onlaın shalynǵan qurban etterin muqtajdarǵa taratýǵa volonterlerdi shaqyrdy, dep habarlaıdy QazAqparat tilshisi.

«Karantın kezinde onlaın qurbandyq shalý jobasyna memleketimiz qoldaý kórsetýde. Ár oblysta qurban shalatyn oryndar belgilenip, jergilikti ákimdik pen sanıtarlyq dárigerlerdiń ruqsatymen, tártip saqshylarynyń qadaǵalaýymen karantın talaptaryn qatań túrde saqtaı otyryp oryndalady. Osy tusta ár oblystyń dinı ahýalyna jaýap beretin mekemelerdi bizdiń oblystyq ókildiktermen birge jumys isteýge shaqyramyn. Osy maqsatta dinı basqarma men obylstyq meshitter janynan aqparat berý ortalyqtary da quryldy. Onlaın qurbandyq týraly aqparat alǵysy keletin azamattar osy ortalyqtarǵa habarlasa alady», - dedi spıker Ortalyq kommýnıkatsııalar qyzmetinde ótken onlaın brıfıngte.

Sonymen birge, Bas múftı osyndaı qıyn-qystaý kezde azamattardy pendeshilikke salynyp, paıda tabý men alypsatarlyqqa barmaı, mal baǵasyn qymbattatpaýǵa, halyqtyń jaǵdaıyn eskerýge shaqyrdy.

«Qasapshylar da óz qyzmetine alatyn aqysyn qymbattatpaı, janashyrlyqpen elge qyzmet etedi dep úmittenemiz. Qurbandyq shalýdy júzege asyrý úshin oblys, qala ákimderin, sanıtarlyq-epıdemıologııalyq basqarma qyzmetkerlerin tártip saqshylarymen birlesip atsalysýǵa úndeımin. Shalynǵan qurban etterin áleýmettik az qamtylǵan otbasylarǵa, muqtaj jandarǵa úlestirý úshin eriktilerdi saýaby mol iske qol ushyn berýge shaqyramyz», - dedi Naýryzbaı qajy Taǵanuly.

Buǵan deıin QMDB tóraǵasy Sátpaev qalasyndaǵy oqıǵaǵa qatysty pikir bildirdi jáne qashyqtan qurban shalý júıesiniń qalaı jumysisteıtinin túsindirdi.

31 shilde kúni Qazaqstan meshitterinde Qurban aıt namazy oqylmaıdy.

Foto: ummet.kz