Onkologııamen kúreste qoldanystaǵy ádis-tásilderdi qaıta qaraý qajet – Májilis depýtaty

ASTANA. QazAqparat – Elimizde onkologııalyq aýrýlardyń aldyn alý jáne onymen kúresýdegi problemalardy sheshý maqsatynda arnaıy jumys tobyn qurý usynyldy. Jumys toby atalǵan dertke shaldyqqandarmen kezdesip, olardyń muńyn tyńdap sodan soń onyń sheshý joldaryn qarastyrady. Atalǵan máseleni Májilis depýtaty Dınara Naýmova kóterdi, dep habarlaıdy QazAqparat tilshisi.

«Elimizde onkologııa máselesi kúrdeli. Bul boıynsha maǵan biraz adam bylaı da, jeli arqyly da júgindi. Onkologııaǵa shaldyǵyp bastan keshkenin aıtyp bergender bar. Onkologııalyq aýrýlar máselesi boıynsha, aldymen qandaı naqty qadamdar jasaı alamyz sol mańyzdy. Ekinshiden, máselege ýaqytyly mán berý kerek. Búgin Májilis otyrysynda osy taqyrypta saýal joldadym. Qobaljý boldy, sebebi másele mańyzdy ári bul meniń depatat retinde alǵashqy saýalym», - dedi Dınara Naýmova Jibek Joly telearnasynyń mobıldi stýdııasynda bergen suhbatynda.

Onyń aıtýynsha, mańyzdy máselelerge memlekettiń nazary ýaqtyly aýdarylǵany abzal.

«Onkologııalyq aýrýlardyń aldyn alý jáne onymen kúreste qoldanystaǵy ádis-tásilderdi qaıta qaraý qajet. Eger sala boıynsha problemalar bolsa, demek qoldanystaǵy ádis jaramaıdy, ony ózgertý kerek degen sóz. Osy oraıda meniń usynarym, onkologııa máselelerin qaraıtyn jumys tobyn qurý qajet. Onyń quramyna onkologııalyq dertke shaldyǵyp, zaryn tartqan naýqastardy kirgizý kerek. Atalǵan aýrýdy emdegennen keıingi ońaltý tásilderin de qaıta saralaýdy qajet etedi. Sondyqtan búgin bul másele boıynsha naqty usynystarymdy bildirdim. Másele oń sheshimin tabaly degen úmittemin. Úkimettiń jaýabynan bólek, óz betimizshe áreket etýdi de oılastyryp otyrmyz. Mysaly, jumys tobyn quryp, onkologııaǵa shaldyqqandardyń jaǵdaıyn tyńdap, ony sheshýdiń joldaryn qarastyrý. Sodan keıin iske kóshý. Osy oraıda azamattar ótinishterin áleýmettik jeli arqyly jetkize alady», - deıdi halyq qalaýlysy.