Onkologııalyq naýqastardy emdeýge qansha qarajat bólinedi

ASTANA. QazAqparat – Redaktsııamyzdyń resmı saýalyna jaýap bergen Densaýlyq saqtaý mınıstrligi Medıtsınalyq kómekti uıymdastyrý departamentiniń dırektory Azamat Dúısenov onokologııaǵa shaldyqqan naýqastardy emdeýge jyl saıyn qansha qarajat bólinetinin málim etti.

«Qazaqstanda onkologııaǵa shaldyqqan naýqastar tegin medıtsınalyq kómektiń kepildik berilgen kólemi sheńberinde em alady. Oǵan jyl saıyn shamamen 36 mlrd teńge qarajat bólinedi», - dep jaýap bergen Azamat Dúısenov.

Sonymen qatar qaterli isikke shaldyqqandardy emdeý jaǵdaıyn jaqsartý maqsatynda Onkologııalyq aýrýlarmen kúres jónindegi 2023-2027 jyldarǵa arnalǵan keshendi jospardyń jobasy ázirlengen.

Málim bolǵandaı, aldaǵy 4 jylda myna baǵyttardy damytý kózdelgen:

- halyqqa onkologııalyq kómek kórsetý máseleleri boıynsha normatıvtik-quqyqtyq aktilerdi jetildirý;

- ınfraqurylymdy jetildirý;

- el halqyna onkologııalyq kómek kórsetý sapasyn arttyrý;

- kadrlyq áleýetti damytý;

- onkologııalyq kómekti tsıfrlandyrý;

- onkologııalyq ǵylymdy damytý.

Qosa ketsek, Qazaqstanda onkologııamen aýyratyn 210 myńnan astam adam esepte tur. Onyń ishinde 2021 jyldan bastap 12 848 naýqasqa ota jasalǵan.