Onkologııaǵa kúdik bolǵanda MRT jáne KT tegin júrgiziledi

NUR-SULTAN. QazAqparat - Aǵzada qaterli isik paıda bolýy múmkin degen kúdik týyndasa, ondaı jaǵdaıda qazaqstandyqtar MRT jáne KT sııaqty tekserýlerden tegin ótedi, dep habarlaıdy QazAqparat QR Densaýlyq saqtaý mınıstrligine silteme jasap.

Vedomstvo azamattarǵa qaýipti derttiń alǵashqy belgileri baıqalǵan kezde qaıda baryp, qalaı tekserilý qajettigi jóninde nusqaýlyq taratty.

Onda ambýlatorııalyq jaǵdaılarda qaterli isikke kúdikti patsıentterge mamandardyń konsýltatsııasy jáne tekserý «jasyl dáliz» boıynsha – jalpy kezektilik pen shekteýlerden tys, 18 jumys kúni ishinde júrgiziletini aıtylǵan.

Sondaı-aq, onkologııaǵa kúdik bolǵan jaǵdaıda MRT jáne KT tegin túsiriletini kórsetilgen. Ol úshin tirkelgen emhanadan osy jáne basqa da tekserý túrlerine joldama alý qajet.

Qaterli isikke kúdikti patsıentterdi dıagnozdy anyqtaý úshin tereńdetip tekserý onkologııalyq ortalyqqa júgingen kezden bastap 15 jumys kúni ishinde, emdeý taktıkasyn naqtylaý jáne terapııany derbestendirý 30 jumys kúni ishinde júrgiziledi.

«Eger siz nemese sizdiń týystaryńyz alǵash ret onkologııalyq aýrýmen betpe-bet kezdesip, ne isteý kerek, qaıda barý kerek, qandaı taldaýlar men zertteýlerden ótý kerek ekenin bilmese, onda tikeleı efırlerge qatysýǵa jáne mamandardyń jaýaptaryn tyńdaýǵa shaqyramyz»

delingen mınıstrlik taratqan habarlamada.

Mamandar keńesi 11-14 sáýirde áleýmettik jeliler arqyly júrgiziledi. Spıkerlerdiń tizimi, tikeleı efır ótkizetin kúni men saǵaty mınıstrlik saıtynda kórsetilgen.

Buǵan deıin qaterli isikti erte anyqtaýdyń mańyzdylyǵy týraly jazylǵan bolatyn .